“Bəli, təklifi qəbul etmədim. Xəbərdar olduğum müəyyən məsələlər var idi. Yekun qərarımı dəqiqləşdirmək məqsədilə görüşdük. Yeni baş məşqçi Vitali Borisov, klubun prezidenti Zaur Axundov və vitse-prezident Mahmud Sadıqovla söhbət etdik. Danışığımız elə oldu ki, növbəti mövsümdə də legioner həyatıma davam edim. Sirr deyil ki, Azərbaycan çempionatının səviyyəsi ürəkaçan deyil. Digər tərəfdən, milli komandanı qarşıda çətin sınaqlar gözləyir. Həmin oyunlarda uğurlu çıxış etmək daha vacibdi.

Yeri gəlmişkən, Vitali Borisova uğurlar arzu edirəm. İnşallah, ölkəmizdə oyunçu kimi qazandığı nailiyyətlərin davamını baş məşqçi kimi də gətirər. “Araz-Naxçıvan”ın həm növbəti mövsümdə, həm də Çempionlar Liqasında yaxşı nəticələr əldə edəcəyinə inanıram. Çox istərdim ki, bu komandada çıxış edim. Lakin məqsədəuyğun deyildi.

Legioner həyatıma gəlincə, digər təkliflər hələ də qüvvədədi. Başqa klublardan da müraciətlər var. Hazırda millinin sabiq qapıçısı və futzal meneceri Marat Salyanski ilə birlikdə təklifləri nəzərdən keçiririk. Daha çox çempionatların səviyyəsinə önəm veririk. Əsas məsələ karyeram və yığmanın dünya çempionatının seçmə mərhələsindəki oyunlarında layiqli çıxış etməkdi. Fiziki hazırlığımın yüksək olması mənim üçün çox vacibdi. Hələ ki istirahətə və ailəmə vaxt ayırıram”.