"Mövsümə pis başlamamışdıq. Öz oyunum da normal idi. İlk 5 turda əsas heyətdə şans qazandım. Sonra zədələnərək 4 aya yaxın oynamadım. Bu məni geri saldı. Zədəmi sağaldandan sonra toparlanmağı bacardım, qollar da vurdum. Lakin bu komandam üçün faydalı olmadısa, deməli, mənim üçün də uğursuzluq sayılır. Son turda "Səbail"lə çox gərgin oyun alındı. Səfərə qələbə üçün gəlmişdik, yeganə şansımız görüşdən 3 xalla ayrılmaq idi. Amma alınmadı. “Səbail” yaxşı komandadı, son oyunlarda da cox kreativ futbol sərgiləyirdi. Onlara üstələmək üçün əlimizdən gələni etdik. Heyif, uğursuzluğa düçar olduq. Ustalıq və təcrübə çatmadı. Rəqibin güclü təzyiqinə dözə bilmədik. Belə ağır oyunlar heyətdəki gənclər üçün təcrübə oldu. Əlbəttə, sonuncu olmaq istəməzdik. Elitadan düşməyə layiq komanda deyildik. Yerli futbolçularla yaxşı oyunlarımız oldu, uğurlu nəticələr qazandıq. Elə matçlar da oldu ki, oyun planında üstün idik, amma təcrübəsizlikdən uduzduq. İndi məhz bunun acısını çəkirik. Gələcək karyerama gəlincə, "Şamaxı"nın 1-ci diviziona düşməsi rəsmiləşsə, burda qalmayacam. Danışıq apardığım klublar var, amma hələ ki gözləyirəm".

"Son tura qədər elitada qalmaq uğrunda mübarizə apardıq. Kasad və təcrübəsiz heyətlə inamla döyüşdük. Amma cəhdimiz uğursuz alındı. Hazırda əsas gözləntimiz AFFA İcraiyyə Komitəsinin iclasında elita təmsilçilərinin sayının 12-yə çatdırılması haqda qərardı. "Şamaxı" ilə müqaviləm var. Rəhbərliklə danışacam. Komandanın elitada qalıb-qalmayacağından çox şey asılıdı. Təbii ki, əsas hədəfim premyer-liqada oynamaqdı. Karyeramla bağlı atamla da məsləhətləşəndən sonra qərar verəcəm".

"Mövsüm bizim üçün çətin başladı. Bunun ən böyük səbəblərindən biri premyer-liqa təcrübəmizin az olması, eləcə də kollektivin sıfırdan qurulması və zəif anlaşma ilə bağlı idi. İkinci dövrədə nisbətən daha yaxşı oyunlar kecirdik, qələbələr qazandıq, güclü rəqiblərdən xal almağa başladıq. Amma çox heyif, sonluğu uğurla gətirə bilmədik. Premyer-liqada ilk böyük təcrübələrimdən biri idi. "Sabah"da 5 oyunda elitada çıxış etmək şansı qazanmışdım. Mövsümdən öncə qarşıma bəzi hədəflər qoymuşdum. Onlara çatdığımı düşünürəm. Növbəti çempionatda daha artığını etməyə çalışacam. Hazırda müqaviləylə məxsus olduğum "Sabah"dayam. Bəzi təkliflər var. Amma hələ ki istirahətdəyəm. İstirahəti yekunlaşdırandan sonra karyeramla bağlı ən yaxşı qərarımı verəcəm".