Avropa Liqasının qeyri-rəsmi şəkildə ''Sevilya''nın turniri olması növbəti dəfə sübuta yetirildi.

“Football-plus.az” xəbər verir ki, andalusiyalıları hətta buna qədər heç vaxt avrokubokların finallarında uduzmayan Joze Mourinyo da dayandıra bilmədi. ''Roma''nı penaltilər seriyasında üstələyən ''Sevilya'' bu turniri 7-ci dəfə qazandı. Mourinyo oyundan sonra əsəbdən özünə yer tapmırdı. İkincilik medalını tribunadakı fanatlardan birinə tərəf atan portuqaliyalı mütəxəssis hakim Entoni Teyloru da unutmadı: ''Roma'' haqsızlığa məruz qaldı. Hakim sanki ispan idi. Lamela ikinci ''sarıdan'' qovulmalı idi''. Mourinyo tək bununla kifayətlənmədi. Sosial şəbəkələrdə onunla bağlı maraqlı bir video yayılıb. Belə ki, ünlü məşqçi oyundan sonra Budapeştdəki stadionun parkinq bölümündə hakimlə qarşılaşdı. O, ingiltərəli ədalət təmsilçisini görən kimi onu sərt sözlərə ''qonaq etdi'': ''Sən lənətə gəlmiş rüsvayçısan. Bəli, lənətə gəlmiş rüsvayçı. Kəs səsivi''. Teylor hətta öz maşınına əyləşdikdən sonra da Mourinyo ona yaxınlaşaraq ''təbrik edirəm, sən lənətə gəlmiş rüsvayçısan'' sözünü təkrar etdi. Teylor finalda 13 sarı vərəqə göstərdi ki, bu da turnirin yeni rekordu oldu. Onlardan 7-si ''Roma''lılara göstərildi.