“Sabah” 2022/23 mövsümünün qalibi oldu
Srağagün Azərbaycan Basketbol Liqasında 2022/23 mövsümünün qalibi məlum oldu.
Titula “Sabah” sahib çıxdı. Final seriyasının 5-ci dueli çərçivəsində “Sərhədçi” İdman Mərkəzində “Gəncə” ilə qarşılaşan paytaxt klubu dramatik qarşılaşmada çempionluğu əlavə vaxtda rəsmiləşdirdi - 86:85. Ən məhsuldar basketbolçular “Sabah”dan Entoni Patti (24 xal, 13 ribaund), “Gəncə”dən isə Kollin Törner (26 xal, 11 asist) oldu. Final seriyasının ən dəyərli oyunçusu (MVP) da amerikalı Patti seçildi.
“Sərhədçi”də keçirilən görüşə böyük maraq var idi. Qarşılaşmanı iqtisadiyyat naziri Mikayıl Cabbarov, “Huner Group”un rəhbəri Ehtiram Quliyev, “Sabah”ın prezidenti Maqsud Adıgözəlov, qadın voleybolçulardan ibarət yığmaın kapitanı Ayşən Abduləzimova və başqa tanınmış şəxslər izləyirdi. Həm “Sabah”, həm də “Gəncə” azarkeşləri görüşə xüsusi rəng qatdı. 4 çeyrəyin hamısında gərgin mübarizənin şahidi olduq. Qarşılaşmanın sonlarında gəncəlilər öndə olsa da, Pattinin “üçlüy”ü “bayquşlar”ı məğlubiyyətdən xilas etdi. Əlavə vaxtda isə bakılılar daha yaxşı oyun sərgiləyərək qələbə qazandı. Beləliklə, ölkəmizdə basketbol mövsümü başa çatdı. Kiçik çatışmazlıqlar olsa da, federasiya alqışalayiq iş ortaya qoya bildi. Ümid edirik ki, bu mövsüm Azərbaycan basketbolu üçün sözün əsl mənasında yeni nəfəs, inkişafın başlanğıcı olar.
Oyundan sonra Basketbol Federasiyasının prezidenti Emin Əmrullayev jurnalistlərin suallarını cavabladı. Qurum rəhbəri növbəti mövsüm liqada 10 və ya 12 komandanın olacağını istisna etmədi:
“Çox maraqlı oyun oldu. Basketbol həvəskarları matça böyük həvəslə baxdılar, zövq aldılar. Əvvəlcədən də düşünürdük ki, final 5 görüşdən ibarət olsa, basketbolun ölkədə populyarlaşması baxımından daha maraqlı alınar. Oyunda həm həyəcan, həm də dramatiklik var idi. Qalib komandanı təbrik edirəm. Ancaq fikrimcə, ən böyük qalib Azərbaycan basketbolu oldu. Növbəti mövsümlərdə daha maraqlı çempionat izləyəcəyimizə ümid edirəm”.
Əmrullayev liqada daha çox klubun iştirakını istəyir:
“Bir çox futbol klubu tərəfindən də maraq var. Bəziləri növbəti mövsümdə, bəziləri isə bir il sonra basketbol komandası formalaşdırmaq istəyir. Klubların istəyi bizim cəlb edə biləcəyimiz saydan daha çoxdu. Basketbolun coğrafiyasının genişlənməsində maraqlıyıq. Azərbaycanın digər bölgələrində də basketbolun olmasını istəyirik. İnanırıq ki, əldə olunan nailiyyətlər daha çox sponsor cəlb etməyimizə imkan verəcək. Belədə klublara dəstəyin həcmi artacaq. Klubların sayının artması legioner limitinin “4+1” olmaq ehtimalını da artır. Yerli oyunçuların sayı hələ çox deyil. Hazırda əsas hədəfimiz klubların sayını artırmaqdı".
ABF prezidenti Azərbaycan klublarının avrokuboklarda iştirakına çalışdıqlarını deyib:
“Bununla bağlı hansısa tələblər ola bilər. İndiki mərhələdə əsas problemimiz lisenziya ilə bağlı deyil. Azərbaycan uzun fasilədən sonra Avropa arenasına qayıdacaq. Bu, danışıqlarımızdan asılı olacaq. Həm biz federasiya olaraq, həm də bəzi klublar avrokuboklarda iştirak etmək niyyətindədi. Yenə də iyulun sonlarına yaxın bunu daha dəqiq biləcəyik. Bu, bizdən asılı məsələ deyil. Amma reallaşacağına inanırıq. Yeganə zəruri şərt FİBA ilə danışıqlardı. Danışıqlara hələ başlamamışıq. Amma avrokuboklarda iştirak üçün ciddi maneə də görmürük”.
Əmrullayev sonda milli komanda ilə bağlı da fikirlərini paylaşdı:
“Kişilərdən ibarət yığma C divizionunda çıxış edir. Növbəti mövsümdən ənənəvi seçmə turnirlərə qatılmağı düşünürük. İlkin təsnifat mərhələsində oynaya bilərik. Bu, FİBA ilə noyabrda aparılacaq danışıqlardan asılı olacaq. Təsnifat mərhələlərində qalib olsaq, ənənəvi turnirə qatılacağıq. Əks halda, yəqin ki, növbəti il də C divizionunda oynayacağıq. Bu dəqiqləşəndən sonra yığmanın baş məşqçisi ilə bağlı qərar verəcəyik. Hazırda müzakirə mövzusu deyil. Yerli məşqçilərin və seleksiyaçıların daimi nəzarəti var. Ayrı-ayrı milli üzvləri və namizədlərlə bağlı statistika toplanır. Yığmanın vaxtı çatanda bununla bağlı qərar statistikalara uyğun veriləcək”.
“Sabah”ın baş məşqçisi Elşən Yusubov bunları söylədi:
“Finalda iki layiqli komanda oynadı. Məqsədimiz hər görüşdə qələbə qazanmaqdı. Əvvəlki 4 oyun bərabər mübarizə şəraitində keçdi. Komanda ruhu və oyunçuların istəyi qələbə qazanmağa kömək etdi. Bu gün hesabda öndə idik, amma çətin idi. Basketbolda hər şey tez dəyişir. Qələbəni Azərbaycan basketbolunun sabahına həsr edirəm”.
Zədə üzündən “Gəncə”yə tam kömək edən bilməyən Amil Həmzəyev məğlubiyyətin səbəbini belə izah etdi:
“Doğru anlarda cərimə etmədik. “Sabah” isə 4-cü çeyrəyin sonlarında oyunun əlavə vaxta getməsi üçün hər şey etdi. Burda da şansımız oldu, çünki rəqib daha çox cərimə edirdi. Amma psixoloji üstünlük “Sabah”da idi. Onları “bağlaya” bilmədiyimiz üçün taktiki qayda pozuntularına yol verməli olduq. Təəssüf ki, uşaqlar bunu da bacarmadı. Bu gün qələbə qazanmaq istəyirdik. Yorğunluq da təsir göstərdi. Özüm də uğurlu çıxış etmədim. İynəli halda oynadım”.
İLKİN SULTANLI
Digər xəbərlər
