"Turan Tovuz"un bombardiri təklifləri dəyərləndirəcək - AÇIQLAMA
"Mövsüm başa çatdı. Sonuncu oyunda "Qarabağ"a qarşı yaxşı oyun sərgilədik. Düzdü, məğlub olduq. Başa düşmək olar. Futbolçuların çoxu yorğun idi. Enerjimiz aşağı idi. Lakin əlimizdən gələni etdik. Buna rəğmən, yaxşı oyun sərgilədik".
Bu sözləri "Football-plus.az"a açıqlamasında Runi Eva deyib. "Turan Tovuz"un forvardı Qərb təmsilçisində qalıb-qalmayacağı haqda da danışıb:
"Ümumiyyətlə, mövsüm bizim üçün yaxşı keçdi. İlk dəfə idi ki, premyer-liqada çıxış edirdik. Çempionatda qalmağı bacardıq. İlk il üçün 6-cı pillə əla nəticədi. Deyərdim ki, bu mövsüm bizim üçün fantastik keçdi. Komandada qalmağıma gəlincə, rəhbərliklə danışacam. Daha sonra təklifləri dəyərləndirəcəm. Mənim üçün ən yaxşısı nədisə, onu da seçəcəm. Burda xoşbəxtəm. Əla ab-hava var. Yaxşı insanların əhatəsindəyəm. Lakin əvvəlcə danışdıqdan sonra qərarımı dəqiqləşdirəcəm".
Kamerunlu hücumçu komandanın bombardiri olması barədə də danışıb:
"Buna görə xoşbəxtəm. 16 qola imza atdım. Bu, təkcə mənim uğurum deyildi. Komanda yoldaşlarımın sayəsində bu qədər qol vurdum. Bu, kollektivin gücü idi. 16 qol vurmağımda əməyi keçən bütün futbolçulara təşəkkür edirəm".
İLKİN SULTANLI
Digər xəbərlər
