Dünən Fransa çempionatının 37-ci turunda PSJ səfərdə ''Strasbur'' ilə 1:1 oynadı.

"Football-plus.az" xəbər verir ki, Paris nəhəngi bu nəticə ilə ardıcıl 2-ci, son 11 ildə 9-cu, tarixinin isə 11-ci çempionluğunu qazandı. Bununla da PSJ 10 çempionluğu olan ''Sent Etyen''i geridə qoyaraq Fransa çempionatında ən çox çempion olmuş kluba çevrildi. Oyun parislilərin yeganə qolunu vuran Lionel Messi üçün də əlamətdar oldu. Argentinalı ulduz peşəkar karyerasının 43-cü titulunu qazandı və futbol tarixinin ən titullu oyunçusu statusunda olan Daniel Alveşə çatdı. Bundan başqa Leo bir göstəricidə prinsipial rəqibi Kriştiano Ronaldonu geridə qoyaraq rekordu ələ keçirdi. Belə ki, o, ''böyük beşlik'' ölkələrinin milli çempionatlarında 496-cı qolunu vurdu! Ronaldo 495 dəfə fərqlənmişdi.