“Bir oyun az keçirmişik və 9-cu pillədəyik. Eyni zamanda ən çox qol vuran 3-cü komandayıq. Dianye və Borini hərəyə 15 qol vurub. Komandamdan çox məmnunam. Oyunçular oyunumuzdan zövq alır. İnkişafa meyilli olan bir çox gənc futbolçumuz var. Rayyan Baniya (Benin və türkəsilli italiyalı futbolçu – red.) bunlardan biridi. Onu və Ləvənt Mərcanı bir çox klubun izlədiyini bilirəm. Ləvənt əslində hücumameyilli yarımmüdafiəçi idi. Mən onu sol cinah müdafiəçisinə çevirdim. Bu mövqedə əla təsir bağışlayır. Ümumi götürəndə Türkiyə çempionatı çox çətin və səviyyəli bir turnirdi. Burda yüksək səviyyədə oynayan bir çox klub var. İstanbulun Avropa hissəsində yerləşən Nişantaşıda yaşayıram. Hər gün evimin həyətindən Boğaz mənzərəsini görə bilirəm. Əsrarəngiz bir görüntüdü. Düzdü, tıxac həyatı bir qədər çətinləşdirir. Amma İstanbul 20 milyonluq meqapolisdi. Təəssüf ki, Türkiyədə faciəvi zəlzələ baş verdi. Çox insan dünyasını dəyişdi. İnsanlar böyük acılar çəkdi. Türkiyə çox üzücü bir dönəmi geridə buraxdı. Amma əminəm ki, yenidən ayağa qalxacaqlar. “Fatih Karagümrük” rəhbərliyi mövsümün sonunda bitəcək müqaviləni yeniləmək üçün indidən mənə təklif irəli sürüb. Ancaq bu məsələni mövsüm bitdikdən sonra müzakirə etmək daha yaxşı olar. Karyeramın inkişafına və doğru zamanda doğru yerdə olmağa diqqət yetirirəm. “Yuventus”la çox yaxşı münasibətlərdəyəm. Oranın köhnə işçiləri ilə arabir yazışır, xəbərləşirəm. Hətta bir müddət öncə Andrea Anyelli ilə də görüşdüm. “Yuventus” kimi yüksək səviyyəli və ciddi hədəfləri olan kluba, təbii ki, dönmək istəyərəm. Karyeramdakı ən yaxşı məşqçi kim olub? Həqiqətən də bir çox önəmli mütəxəssislə çalışmışam. Karlo Ançelotti həm məşqçilik, həm də insani keyfiyyətləri sayəsində başqalarından daha çox titul qazanıb. “Böyük beşliy”in bütün ölkələrində çempion olub. Amma onu Lippi, Alleqri və ya Kontedən necə üstün tuta bilərəm?! Konte və Alleqri fərqli məşqçilərdi. Futbolda həmişə qalib gələn haqlıdı. Mənim üçün Qvardiola unikaldı. Həmişə yeniliklərə cəhd edir. Amma fiziki göstəricilər müasir futbolda getdikcə daha böyük rol oynamağa başlayır və bunu nəzərə almaq lazımdı”.