“Nə qədər danışsaq da, reallıq var. Təbii ki, burda maddiyyat əsas rol oynayır. Bununla bağlı dəqiq məlumatım yoxdu. Lakin yazılanlara inansaq, onun maaşı 750 min avro və ya 1 milyon dollar olacaq. Qiymət hardasa bu civardadı. Bu da futbolçu üçün ciddi rəqəmdi. Həm də ərəb ölkələrində, Çində, Taylandda illik müqavilərdən əlavə, yüksək məbləğdə bonuslar verilir. Bundan başqa, oyunçuların məişət şəraiti çox yaxşı olur. Belə məqamlar da futbolçuları cəlb edir. Müqavilə ikiillik olduğuna görə ona maraqlı gəlib. Bir az fərdi yanaşmadı. Buna görə kimisə günahlandırmaq olmaz.

Əlbəttə, hamımız istəyərdik ki, Ramil daha səviyyəli kluba getsin. Amma bu, onun seçimidi, hörmətlə yanaşmalıyıq. Sadəcə, bizi təəccübləndirən məqam yaşla bağlıdı. Onun yaşı o qədər də çox deyil. Məncə, Ramil daha yaxşı liqalarda oynayacaq potensialdadı. Amma nə etmək olar?! Tayland çempionatının maraqlı cəhədləri var. 16 komandadan ibarət liqadı. Oyunların çoxunu yetərincə azarkeş izləyir. 15-30 min aralığında fanat stadiondan komandalarına dəstək olur. Tayland lüks həyatı olan ölkədi, ora çoxlu turist səfər edir. Ramilin yaşayışla bağlı problemi olmayacaq. Yeganə müsbət məqam Koreya, Çin, Yaponiyaya yaxın olmasıdı. Adını çəkdiyim ölkələrin çempionatı Taylandla müqayisədə səviyyəlidi. Həmin liqaların təmsilçilərinə qarşıdakı illərdə transfer oluna bilər”.