“Mən olduğum masada heç bir futbolçu milli ilə bağlı pul söhbəti edə bilməz!”
Ayaz Quliyev məsələsi yenə gündəmi zəbt edib.
“Football-plus.az” xəbər verir ki, 26 yaşlı futbolçu “Matç TV”yə yenə milli komandamız haqda danışıb. Deyib ki, futbolçu karyerasını əsasən klub fəaliyyəti ilə qurur. Milli ilə bağlı Azərbaycana nə “hə”, nə də “yox” deyib. Sadəcə, müəyyən şərtləri razılaşdırdıqdan sonra bu məsələ ilə bağlı qərar verə bilər. Görəsən, Ayazın təklifləri və şərtləri nədən ibarətdi? Yığmada oynamaq üçün ev, maşın, əlavə mükafat istəyir? Nədi Ayazın dərdi? Bu sualları millinin meneceri İlqar Qurbanova ünvanladıq:
“Ayazla bağlı məsələ hələ də sabit olaraq qalır. Futbolçu ilə danışıqlarımız davam edir. Amma burda bəzi məsələlər var. Bilirsiz ki, yarımmüdafiəçi “Ximki”də çıxış edir. Azərbaycan millisini seçsə, orda legioner sayılacaq. Əsas problem məhz budu. Bundan başqa, milliyə dəvət olunacaq futbolçulara baş məşqçi qərar verir. Çalışdırıcı da oyunçuların performansına uyğun olaraq siyahı tərtib edir. İndiki məqamda formada olmayan futbolçu yığmaya hansı faydanı verə bilər? Yenə deyirəm, əsas problem pasport məsələsidi. Ayaz həm də Rusiya vətəndaşıdı. Azərbaycan pasportunu alacağı təqdirdə Rusiyada legioner sayılacaq. Şərtlərə gəlincə, mən olduğum masada heç bir futbolçu milli ilə bağlı pul söhbəti edə bilməz! Mən zamanında “Fənərbaxça”da çıxış etmişəm, Vaqif Cavadov ÇSKA-da. Biz həmin vaxt pul söhbəti etməmişik, yığma üçün can qoymuşuq. Millidən pul istəmək nədi? Bura bizim dəyərimizdi. Yığmada cani-könüldən oynamaq istəyənlər çıxış etməlidi”.
İLKİN SULTANLI
