Ukraynada hesabat turu qəribə tendensiya ilə müşayiət olundu: ilk 4 pillədə qərarlaşan komandaların hər biri meydandan 2 top fərqli qələbə ilə ayrıldı.

“Kolos”un qonağı olan “Şaxtyor” rəqibi erkən qolundan şoka düşsə də, 2-ci hissədə hadisələrin axarını dəyişməyi bacardı. Oyun canlanan kimi “Şaxtyor” penalti qazandı və Bondarenko hesabı bərabərləşdirdi. 5 dəqiqə sonra Traore məhz onun ötürməsini qola çevirməklə donetskliləri irəli çıxardı. Sona yaxın Kelsi də fərqləndi.

Liderin ən yaxın izləyicisi “Dnepr-1” də səfərdə qələbəyə sevindi. Qolsuz bitən ilk yarının ardından Dovbik cari mövsümdəki 20-ci qolunu vurdu, 5 dəqiqə sonra Koqut fərqi artırdı.

Cari mövsümü inamlı keçirən komandalardan biri də “Zarya”dı. Luqansk klubu hesabat turunda Qriqorçukun çalışdırdığı “Çernomorets”i məğlub etdi. Panamalı Gerrero bu qələbədə qol və məhsuldar ötürmə ilə böyük rol oynadı. Cari mövsümdə 15-ci qələbəsini qazanan “Zarya” 3-cü yeri tutduğu 2020/21 mövsümündə də eyni nəticə ilə yadda qalmışdı.

“Dinamo” da 3-cü yerə iddiasını gizlətmir. Mirça Luçeskunun xəstəliyi üzündən baş məşqçi səlahiyyətlərini Aleksandr Şovkovski yerinə yetirir. Kiyevlilər autsayderlərdən “Metallist”in qapısına yalnız son 20 dəqiqədə yol tapdı. Bəlkə də xarkovlular meydandan xalla ayrıla bilərdi. Sadəcə, 48-ci dəqiqədə Kabayevi “son ümid folu” ilə dayandıran Romanyuk meydandan qovulmaqla komandasını azlıqda qoymuşdu.

Turun qalan nəticələrindən “Krivbass”ın “Aleksandriya” üzərindəki qələbəsini qeyd etmək olar. İş ondadı ki, Ruslan Rotan “sükan arxasına” keçəndən bəri “Aleksandriya” heç kimə uduzmurdu. Emil Mustafayev 73-cü dəqiqədə meydana çıxdı və komandasını məğlubiyyətdən xilas edə bilmədi.