Qəbələdə keçirilən oyunda üz-üzə gələn komandalardan heç birinin turnir hədəfi qalmadığından, futbolçular meydana imic xatirinə çıxmışdı. Xüsusilə “Neftçi” özünü sübut etməli, ardıcıl uğursuz oyunlardan sonra azarkeşlərinin könlünü almalı idi.

Yeri gəlmişkən, “ağ-qaralar”ın sonuncu dəfə aprelin 8-də, daha dəqiq desək, 29-cu turda “Sumqayıt” üzərində qələbəyə sevindiyini qeyd etmək yerinə düşər. Bu səbəbdən Qəbələdə keçirilən görüş bakılılar üçün özünütəsdiq qarşılaşması idi.

"Football-plus.az" xəbər verir ki, paytaxt təmsilçisi 90 dəqiqənin tamamında istəyinə çatsa da, qələbə Regekampfın komandasına heç də asan başa gəlmədi. Nominal meydan sahibləri matça daha yaxşı başladı.

Gəncəlilər topa daha çox nəzarət edir, rəqib qapısı önündə təhlükəli vəziyyətlər yaradırdı. İlk yarıya əlavə olunan 3-cü dəqiqədə “sarı-göylər” Brkiçin qoruduğu qapıya yol tapa bildi. Bəstəboy Şuaybu Fəridin cərimə zərbəsindən qapı önünə asmasını başla dəqiq tamamladı. Buna qədər isə qonaqlar 30-cü dəqiqədə sevinməyə yaxın olsa da, hakim VAR-a baxaraq Stankoviçin zərbəsindən sonra topun qapı xəttini keçmədiyini bildirərək, qolu hesaba almadı. Bundan 8 dəqiqə sonra Boqomolski sürəti hesabına “Kəpəz”in iki müdafiəçindən sıyrılıb cərimə meydançasına daxil olaraq “çərçivə”ni nişan aldı. Ancaq onun zərbəsindən sonra top toru yandan silkələdi.

Fasiləyə saniyələr qalmış qapısında qol görməsinin “Neftçi”yə psixoloji cəhətdən ağır zərbə vuracağını düşünmək olardı. Ancaq “ağ-qaralar” ruhdan düşmədi, əksinə, ikinci hissədə favorit statusunu doğrultdu. Bunda fasilədən sonra meydana çıxan futbolçuların da böyük rolunun olduğunu qeyd etmək lazımdı. İkinci yarıda daha məzmunlu və sürətli oyun nümayiş etdirən komanda 65-ci dəqiqədə hesabı bərabərləşdirdi. Caber Eminin kornerdən asmasını bir toxunuşla tora qovuşdurdu. 84-cü dəqiqədə isə Lebonun asmasını Buludov dəqiq tamamladı. Artıq “Kəpəz”in geridönüş edəcəyi inandırıcı görünmürdü. Gəncə təmsilçisi 80-ci dəqiqədən etibarən oyundan “qopmuşdu”. Matçda son nöqtəni isə Lebon qoydu. Onun zərbəsindən sonra top yolüstü Elçinə dəyərək qapıya daxil oldu. Bununla da bakılıların təxminən ayyarımlıq qələbəsiz seriyasına son qoyuldu.

Gözdən qaçmadı
* Nominal meydan sahiblərini 50-yə yaxın azarkeş dəstəklədiyi halda, “Neftçi” Qəbələdə, demək olar ki, azarkeşsiz qalmışdı. “Forza Neftçi” səfər matçında tribunada yox idi. “Kəpəz”lə matçda “ağ-qaralar”ın cəmi 3 azarkeşi var idi ki, 90 dəqiqənin tamamında futbolçular onların yer aldığı sektora gedərək təşəkkürünü bildirdi.
* Fasilədə “Kəpəz”in bir azarkeşi, özünü qazi kimi təqdim edən şəxs “sportinfo.az”ın əməkdaşı Həbib Aslanova yaxınlaşaraq saytı Tərlan Əhmədova qarşı qərəzli olmaqda ittiham etdi. Həmkarımız qazinin söylədiklərini səbrlə dinləyib “Kəpəz”in baş məşqçisinə qarşı qərəzli yazı yazmadığını bildirdi.
* Fasilədə “sarı-göylər”in təhlükəsizlik xidmətinin rəhbəri Elmar Əliyev Gəncədən gələn azarkeşlərə müraciət edərək tribunada qeyri-etik ifadələr işlətməmələrini istədi. Əliyev təhqirə yol verənləri polisə təhvil verəcəyini vurğulamağı da unutmadı.
* Qarşılaşma başa çatandan sonra Gəncədən gələn qazi bu dəfə “Kəpəz”in İdarə Heyətinin sədri İlqar Nadiriyə yaxınlaşaraq yüksək tonla komandanın durumu ilə bağlı etirazını bildirdi.

RƏŞAD