Dünyanın sabiq bir nömrəli raketkası Rafael Nadalın azarkeşləri məyusluq içindədi. Axı ünlü ispaniyalı tennisçi yanvarın 18-dən – “Australian Open”in 2-ci mərhələsində amerikalı Makkenzi Makdonalda uduzduğu (4:6, 4:6, 5:7) gündən bəri heç cür korta çıxa bilmir.

Həmin oyunda sol ayağını zədələyən Nadal srağagün mətbuat konfransı keçirib və builki “Rolan Qarros”da da çıxış edə bilməyəcəyini deyib: “Zədənin sağalması istədiyim kimi getmədi. Belə durumda Fransa Açıq Çempionatında iştirak mümkünsüzdü.

Mən “Rolan Qarros”a heç cür qatıla bilməyəcəm. Bu mənim yox, bədənimin qərarıdı. Ümumiyyətlə, qarşıdakı bir neçə ay ərzində tennis oynamağı düşünmürəm”.

Qarşıdakı bir neçə ayda kortda görünməyəcək 36 yaşlı tennisçiyə karyerasını nə vaxt bitirəcəyi ilə bağlı sualların ünvanlanması təbiidi. O, həmkarlarımızın bu mövzuda suallarına belə cavab verib:

“Düşünürəm ki, 2024 karyeramın son ili olacaq. İndi hədəfim bir müddət fasilə verməkdi ki, ardından idman karyeramın sonuncu mövsümünü keçirməyə hazır olum. Özümə belə imkan yaratmaq istəyirəm”.

Xatırladaq ki, builki “Rolan Qarros” 28 may – 11 iyun aralığında keçiriləcək. Ötən il Nadal 14-cü dəfə bu turnirin qalibi olub. Ümumiyyətlə, 36 yaşlı tennisçinin hesabında “Böyük dəbilqə” seriyalı turnirlərdə qazanılan 22 qələbə var. Nadal bu göstəricidə liderliyi Novak Cokoviçlə bölüşür. Karyerası boyunca isə 92 titul qazanıb.