''Mançester Siti'' bu gün ''Çelsi''ni məğlub edəcəyi təqdirdə zatən çempionluğunu rəsmiləşdirəcəkdi. Amma Xosep Qvardiolanın komandasının özünü əziyyətə salmasına ehtiyac qalmadı.

“Football-plus.az” xəbər verir ki, son həftələrdə kəskin enişdə olan ''Arsenal''ın dünən ''Nottingem Forest''ə minimal hesabla uduzması ilə ''Siti'' meydana çıxmadan çempionluğunu rəsmiləşdirdi. Qeyd edək ki, ''Arsenal'' bu mövsüm ümumilikdə 284 gün zirvədə yer alsa da, çempion ola bilmədi. Bu, nəinki premyer-liqanın, hətta bütövlükdə İngiltərə çempionatı tarixinin antirekordudu. İndiyə qədər bu qədər uzun müddət lider olan komandanın həmin mövsümün sonunda çempion ola bilməməsinə rast gəlinməmişdi. Bununla da ''Siti'' ardıcıl 3-cü, son 6 ildə 5-ci çempionluğunu rəsmiləşdirdi. Qvardiola isə 12-si ''Siti''də, 14-ü ''Barselona''da, 7-si ''Bavariya''da olmaqla məşqçi karyerasında 33-cü titulunu qazandı. Bu mütəxəssisin ''böyük beşlik''də işlədiyi 14 mövsümün 11-də çempion olması da diqqət çəkir. O, yalnız 2011/12-də ''Barselona''nın başında və 2016/17-də, 2019/20-də ''Siti''nin başında çempion ola bilməyib.