Bugünlərdə “Liverpul” İngiltərə Premyer-liqasının (İPL) rəhbərliyinə “Enfild” stadionunun yenidən qurulmasına görə 2023/24 mövsümündəki ilk oyunu səfərdə keçirməklə bağlı xahiş edib.

"Football-plus.az" xəbər verir ki, “Enfild Roud”un dəyəri 101 milyon dollar olan, stadionda əlavə 7 min yer təmin edəcək və tutumunu 61 minə çatdıracaq yeni tribunasının tikintisi avqustun əvvəlinə qədər başa çatmalıdı. Ancaq müvafiq təhlükəsizlik sertifikatı almaq üçün burda test tədbirləri keçirmək də zəruridi. “Enfild” rəhbərliyi belə hesab edir ki, yeni mövsümdəki ilk oyunun avqustun 12-də səfərdə keçirilməsi hər şeyi qaydaya salmaq baxımından onlara yetərincə fəalliyyət azadlığı qazandıracaq. “Liverpul”un stadionların istismarı üzrə vitse-prezidenti Pol Kattillin fikirləri:

Yürgen Kloppun təntənəli şəkildə beli yerə vurduğu 2021-ci ilin sentyabrından bəri stadionun tutumu hələ artırılmasa da, mövcud tribunalar ətrafında yeni konstruksiya formalaşdırılıb. “Buckingham Group” inşaat şirkəti “Enfild”dəki hər oyunun startından 24 saat əvvəl stadionu klubun ixtiyarına verir, ancaq cari mövsümdə “Aston Villa”ya qarşı keçiriləcək (mayın 20-də) son ev oyununun ardından layihə həlledici mərhələyə qədəm qoyacaq. Qazonun üstü örtüləcək və tribunaların üstünün dağıdılması üçün iki böyük kran cəlb olunacaq. Tavan söküləndən sonra inşaat şirkətinin ixtiyarında köhnə üst yarusun sökülməsi üçün bir həftə olacaq. Aşağı yarus təmir olunacaq və yeni struktura birləşdiriləcək. Kattill əlavə edir: “Bu, layihə üçün növbəti vacib həlqədi. Müddətə uyğunlaşmalı və işə başlamalıyıq ki, yeni mövsümün startına qədər hər şeyin hazır olacağına əmin olaq”.

“Enfild Roud”un yeni tribunası oyun günlərində əlavə 400 iş yerinin yaranmasına səbəb olacaq. Əlavə 7 min yerdən 2 minə yaxını yeni və rahat lojalarda əyləşəcək korporativ qonaqlar üçün nəzərdə tutulacaq. Genişlənmə çərçivəsində minə yaxın yeni mövsümlük abunə satılacaq, həmçinin hər oyun üçün əlavə 3000 bilet satışa çıxarılacaq. Bundan başqa, qapıarxası aşağı yarusda gənc azarkeşlər (17-21 yaş) üçün yeni bölmə yaradılacaq. Qonaq azazkeşlər bundan sonra 6 yox, 8 turniketin xidmətindən yararlana biləcək, onların daha geniş zala çıxış imkanı olacaq. Avqustun əvvəlindəki test tədbirləri çərçivəsində yoxlama oyununun keçirilməsi nəzərdə tutulmur. Klopp iyulda komandanı Almaniyaya – mövsümöncəsi toplanışa aparacaq, “Liverpul” Sinqapurda iki yoldaşlıq oyununun keçirilməsi ilə bağlı da danışıq aparır.

Xatırladaq ki, bu, “Enfild”in həyatındakı ikinci yenidənqurma mərhələsidi. 2016-cı ildə də yeni və əsas tribunanın tikintisi kluba 110 milyon funta başa gəlmişdi. “Fenway Sports Group” 2010-cu ildə klubu alarkən stadionla bağlı dilemma ən böyük problemlərdən biri idi. Yeni stadiona köçmək perspektivi azarkeşlər arasında böyük diskussiya doğurmuşdu. Ancaq Liverpul şəhər şurasının dəstəyi ilə yeni sahiblər “Enfild”i müasirləşdirməyin və genişləndirməyin yolunu tapdı, bu prosesin gedişində şəhərin tarixinə və ənənələrinə də xələl gəlmədi. Kattill deyir: “Sözsüz, dünyadakı iki ən yaxşı stadiondan biridi. Mən artıq 20 ildi burdayam, məhz azarkeşlər bu klubu yaşadır. Bu stadionda, sadəcə, qeyri-adi atmosfer var. Yeni tribunanın açılacağı günü, əlavə 7 min azarkeşin bu atmosferə qatqısını görməkdən ötrü səbirsizlənirəm. “Liverpul”un həyatında qeyri-adi hadisəyə şahidlik edəcəyik”.