Belarus futbolunda böyük qalmaqal yaşanır.

"Football-plus.az" xəbər verir ki, zatən bu ölkənin klubları məlum səbəbə görə avrokuboklarda ev oyunlarını neytral meydanda və azarkeşsiz keçirirlər. Belarus yığmasının isə AÇ-2024-ün seçmə mərhələsindən kənarlaşdırılması gündəmdədi. Bütün bunlar azmış kimi, ölkə futbolunda bir növ “kalçopoli” qalmaqalı yaşanır. Yanvarın sonlarından bəri federasiyanın bəzi klublarla bağlı araşdırma aparması barədə şayiələr dolaşırdı. Amma hər şeyin bu dərəcədə ciddi olacağını az adam proqnozlaşdırardı. Gəlin, əvvəlcə federasiyanın cəzaları ilə tanış olaq.

1. Son 3 ilin çempionu “Şaxtyor”un 2022-də qazandığı son titul əlindən alınıb! Soliqorsk təmsilçisi danışılmış oyunlarda və rəqiblərə stimullaşdırıcı pul təklif etməkdə günahkar bilinib. Eyni zamanda federasiya bu komandaya avrokuboklarda oynamaq üçün lisenziya verməkdən imtina edib. Bundan başqa, bu mövsüm “Şaxtyor”un hesabından 30 xal silinib. Yəni komanda turnir cədvəlində 4-cü pillədən sonuncu – 15-ci pilləyə yuvarlanıb. Komandanın hesabında mənfi 13 xal var. Növbəti mövsümə isə “Şaxtyor” hansı divizionda oynamasından asılı olmayaraq, 20 xallıq cəza ilə başlayacaq və 124 min dollar cərimə ödəyəcək.

2. Təbii ki, ayrı-ayrı futbol adamlarına da cəzalar verilib. “Şaxtyor”un idman direktoru Vladimir Niderqaus faktiki Belarusda “persona non qrat” elan olunub və ömürlük futbol sahəsindən kənarlaşdırılıb! Həbs olunan sabiq futbolçu həm də transfer bəhanəsi ilə xərclənilən pulları mənimsəməkdə günahlandırılır. Klubun sabiq idman direktoru Aleksandr Marçenko beşillik, kapitan Nikita Korzun isə birillik cəza alıb.

3. “Sanksiya atəşinə” təkcə “Şaxtyor” tutulmayıb. 2-ci pillənin sahibi “Energetik-BQU” da gümüş medallardan məhrum olunub, bu yay Konfrans Liqasında oynamasına da qadağa qoyulub. Eyni zamanda bu mövsüm klubun hesabından 20 xal silinəcək. Gələn mövsümə isə bu kollektiv mənfi 10 xalla başlayacaq. Minsk təmsilçisinin məşqçilər korpusuna daxil olan və ölkənin əməkdar məşqçisi olan Anatoli Yureviç beşilliyə futboldan kənarlaşdırılıb.

4. “Belşina” da cəzalanan klublar siyahısındadı. Klubun bu mövsüm üçün 10, gələn mövsüm üçün 5 xalı silinib. Klubun üzvü Dmitri Qomza isə ömürlük futboldan kənarlaşdırılıb.

Belarus müstəqil olandan bəri ölkə futbolunda bu həcmdə qalmaqal baş verməmişdi. Hadisənin təfərrüatlarına keçməmiş xatırladaq ki, Belarusda çempionat “yaz-payız” sistemi ilə keçirilir. 2018-də BATE-nin 13 illik hegemonluğu başa çatdı. 2019-da titul “Dinamo-Brest”ə qismət oldu. Son 3 ildə isə ölkə futbolunda “Şaxtyor” ağalıq edirdi. Ötən mövsümün son turundan öncə “Şaxtyor” “Energetik-BQU”nu 2 xal qabaqlayırdı. Soliqorsklular həlledici turda “Belşina” ilə qarşılaşmada 4:1 hesabıyla qalib gəldilər. Belarus mənbələrinin iddiasına görə qalmaqalın mərkəzində məhz bu oyun dayanır. “Şaxtyor”un rəqibə pul verməsi faktı üzə çıxıb. Maraqlıdı ki, həmin turda “Energetik-BQU” öz meydanında Minsk “Dinamo”suna 1:3 hesabı ilə yenildi. Yəni “Şaxtyor” uduzsaydı da, çempion olacaqdı. Amma oyunlar eyni vaxtda başladığından, təbii ki, heç kim bunu nəvvəlcədən deyə bilməzdi. Deyilənə görə, Niderqaus Qomzayla 20 min dollar qarşılığında oyunun satılması ilə bağlı anlaşıbmış. Özü də Dmitri Qomza “Belşina”nın kapitanı idi və sözügedən matçda meydan sahibləri ikinci qolu məhz onun yersiz şəkildə cərimə meydançasına qayıdaraq kobudluğa əl atmasından sonra təyin olunan penalti ilə vurmuşdular. “Energetik-BQU”nun nəyə görə cəzalandığı barədə konkret məlumat yoxdu. Çox güman, bu komanda da son turdakı rəqibini – Minsk “Dinamo”sunu pulla almağa çalışıb. Amma qeyd etdiyimiz kimi, o matçda meydan sahibləri məğlub olmuşdu. Federasiya və yerli hüquq-mühafizə orqanları ümumilikdə 5 qarşılaşma ilə bağlı araşdırma aparıb. 2022-ci ildəki çempionatın aqibətinə gəlincə, 1-2-ci pilləni tutan klubların cəzalanmasından sonra məntiqlə çempionluq 3-cü pilləni tutan BATE-yə qismət olmalıydı. Amma çempionluq heç kimə verilməyib. BATE-yə, sadəcə, ölkəni ÇL-də təmsil etmək hüququ verilib. Uyğun olaraq 4 və 5-ci yerləri tutan Minsk “Dinamo”su ilə “İsloç” isə KL-in təsnifat mırhələsində oynayacaq. Həm “Şaxtyor”, həm də “Energetik-BQU” məsələ ilə bağlı rəsmi bəyanat yayıb. Hər iki klub iddiaları rədd edib və federasiyanın qərarından apellyasiya şikayəti verəcəyini bildirib.