“Bizi gərgin oyun gözləyir. Rəqib nəinki Azərbaycanda, ölkə xaricində belə möhtəşəm uğurlara imza atmış “Qarabağ”dı. Matçın baxımlı və maraqlı keçəcəyinə şübhə yoxdu. Ehtimallardan biri də qarşılaşmanın “Qarabağ” üçün əlamətdar ola biləcəyidi. Çünki məğlub olsaq, “köhlən atlar” mövsümün bitməsinə iki tur qalmış çempionluğu rəsmiləşdirəcək. Digər ehtimal “Səbail”in qələbəsidi ki, bunu çox istəyirik. Cari “futbol ili” bizim üçün çətin keçdi. Artıq hər oyuna son şans kimi baxırıq. Komanda hər dəfə bunu nəzərə alaraq meydana çıxır. Turnir cədvəlinin sonuncu pillələrində olmaq kollektivdə ümumi psixoloji ağırlıq yaradıb. Rahat oynaya bilmirik. Həmin hisslərin həyəcanı, hər matçın nəticəsinin vacibliyi heyətin rahatlaşmasına imkan vermir. Həqiqətən psixoloji təzyiq son həddə çatıb. “Qarabağ”la matça itki ilə çıxacağıq. Bildiyiniz kimi, Turan Manafov sarı vərəqə limitinı aşdığına görə cəzalıdı. Zədəli yoxdu. Qalan futbolçular meydanda olacaq. Düzdü, “Qarabağ” özünü sübut etmiş komandadı. Amma bu o demək deyil ki, “ağ bayraq qaldıracağıq”. Son ana qədər qələbə uğrunda mübarizə aparmaq lazımdı. Komanda psixoloji cəhətdən yaxşı əhval-ruhiyyədə olmasa da, ağdamlılarla üz-üzə gəlməyə hazırdı”.

“Bizi çətin oyun gözlədiyinin fərqindəyik. “Neftçi” köklü, tarixi, futbol ənənələri olan klubdu. Üstəlik nəzərə almalıyıq ki, rəqib son 4 turda qələbə qazana bilməyib. Bu üzdən matça çox ciddi hazırlaşacaq. Bizim üçün səfər oyunudu. “Neftçi”nin ev oyunlarındakı performansını və yüksək səviyyəli azarkeş dəstəyini nəzərə almalıyıq. Turnir cədvəlinin son pilləsindən qurtulmaq üçün əsl futbol göstərmək lazımdı. Məşqlər planauyğun davam edir. Digər istiqamətlərdə də çalışırıq. Rəqibi düzgün təhlil edib meydanda lazım olanı etmək niyyətindəyik. 3 xal uğrunda sona qədər vuruşacağıq. Futbolçulardan Emil Qasımov zədələnmişdi. Sağalsa da, dinamik keçəcəyini gözlədiyim matça hazır olduğunu düşünmürəm. Başqa zədəli və ya cəzalı yoxdu”.