Misli premyer-liqasının gərgin keçən 32-ci turundan sonra turnir cədvəlinin zirvəsində “sular duruldu”.

Derbidə “Qarabağ”a 2:4 hesabıyla məğlub olan “Neftçi”nin bürünc medalla kifayətlənəcəyi dəqiqləşdi. 48 xalla dördüncü pillədə qərarlaşan “Qəbələ” növbəti 4 oyunda qələbə qazansa belə, 61 xala malik “ağ-qaralar”ı keçə bilməyəcək.

“Zirzəmi”dəki mənzərə isə çaşqınlıq yaratmaqda davam edir. “Səbail” premyer-liqada qalmaq yox, sonuncu yeri əldən verməmək üçün “mübarizə aparırmış” kimi görünsə də, “Şamaxı” ilə arada cəmi 1 xal fərq var. Ümumiyyətlə, son “beşlik”də vəziyyət qarışıqdı. Hətta bir matç belə eyni anda bir neçə klubun qarşıdan gələn mövsümdəki taleyinə aydınlıq gətirə bilər. Belə olan halda “Səbail”lə 10 xallıq fərq yaradan “Turan Tovuz”a belə rahatlaşmaq olmaz. Bununla yanaşı, turnir cədvəlinin 4 və 5-ci yerləri də “dalğalıdı”. “Qəbələ”nin “Səbail”i 4:2 hesabı ilə məğlub etməsi və “Zirə”nin “Turan Tovuz”la matçda (1:3) xal itirməsi 4-cü yer uğrunda mübarizədə bölgə təmsilçisinə təkan verdi. Lakin bu hər şeyi həll etmir. Düzdü, “Qəbələ” Konfrans Liqasına vəsiqə uğrunda mübarizədə böyük addım atıb. Komanda ölkə kubokunda da finala vəsiqə qazanıb. Amma indidən “Neftçi” ilə həlledici görüşün necə bitəcəyini söyləmək çətindi. Bu üzdən 4-cü pillə uğrunda sonadək gərgin mübarizənin gedəcəyini söyləyə bilərik.

Daha dəqiq fikir söyləmək üçün qarşıdakı turlara baxaq. “Qəbələ” 33-cü turda səfərdə “Qarabağ”la qarşılaşacaq. Mayın 2-də “Neftçi”yə 4 qol vuran ağdamlıların məğlubiyyəti gözlənilmir. Ən yaxşı halda “sülh”ə razılaşmaq isə “köhlən atlar”ın kitabında az rast gəlinən hallardan biridi. 34-cü turda “Turan Tovuz”la qarşılaşmaya isə ümidlə baxmaq olar. Təbii ki, tovuzluların 32-ci turda “Zirə”ni 3:1 hesabı ilə məğlub etməsini gözardı etmədən... 35-ci turda rəqib “Şamaxı”dı. Elmar Baxşıyevın komandası səfər görüşündə turnir cədvəlinin doqquzuncusu ilə ehtiyatlı davranmalıdı. Çünki “Şamaxı” elitada qalmaq üçün dəridən-qabıqdan çıxır. Nəhayət, “Qəbələ” son matçda “Kəpəz”i qəbul edəcək. Təcrübəli mütəxəssis Tərlan Əhmədovun bu oyunda səhvə yol verməsi reallıqdan uzaqdı. Hər halda, Elmar bəy bu faktı nəzərə alacaq.

“Zirə”yə gəlincə, 33-cü turda Şamaxıya səfər edəcək komanda toparlanmaq üçün bu fürsətdən mütləq istifadə etməlidi. Çünki xal itkisi avrokubok şansını bir qədər də azaldacaq. Növbəti görüşdə isə rəqib “Kəpəz” olacaq. Rəşad Sadıqovun komadası bu səddi də itkisiz adlamalıdı. Çünki 35-ci turda “Sabah”ın qonağı olacaq zirəlilərin işi daha çətin olacaq. 36-cı tura təsadüf edəcək Sumqayıt səfəri də asan gəzinti vəd etmir. Bir sözlə, “Zirə” 4-cü olmaq istəyirsə, ilk hədəf “Qəbələ” ilə 6 xallıq fərqi aradan qaldırmaq olmalıdı. Təbii ki, gərək Elmar Baxşıyevin komandası da büdrəsin. Amma bu heç də real görünmür. “Qəbələ” hazırda mövsümü 4-cü bitirməyə daha yaxındı. Turnir cədvəlində pillə dəyişikliyi olacaqsa, bu, sadəcə, “Zirə”nin toparlanması, “Qəbələ”nin qəfil çöküşü səbəbindən gerçəkləşə bilər. Bu da ehtimallardan ən zəifidi. Lakin futbol sürprizləri xoşlayan idman növüdü. Bir addım sonra haqda dəqiq fikir yürütmək şansı yox dərəcəsindədi. Son nəticəni zaman göstərəcək. Hadisələrin axarına əsasən isə onu deyə bilərik ki, “Qəbələ” – “Zirə” mübarizəsinin qalibi bölgə təmsilçisi olacaq.

KƏNAN BAHADIR