"Bizim üçün böyük təcrübə oldu. Turnirə ciddi hazırlaşmışdıq. Əlbəttə, bütün qarşılaşmalarda qalib gəlmək istəyirdik. Amma alınmadı. Buna rəğmən, yaxşı çıxış etdiyimizi düşünürəm. Futbolçularım hər oyuna çıxanda onlarda istək, əzm, mərdlik gördüm. Yetirmələrim oyun üslubunda “artırıb”. Bu turnirin tələblərindən biri də hər komandanın heyətindəki bütün oyunçulara şans verilməsiylə bağlı idi. Mən də hamının nəyə qadir olduğunu görmək istədim. İlk oyunda Farer adalarını üstələdik. İkinci qarşılaşmada güclü Albaniyaya məğlub olsaq da, ən xoşuma gələn və dominant futbol sərgilədik. Belə ki, rəqib qapımıza qol vurandan sonra əvvəlcə 5-li müdafiəyə keçdi, sonra bütün komanda ilə müdafiə olundu. Rəqibi sıxdıq və çoxlu qol vəziyyəti yaratdıq. Amma təəssüf ki, qol vura bilmədik. Moldova ilə matçda da üstün tərəf biz idik. 87-ci dəqiqəyə qədər 2:1 hesabıyla irəlidəydik. Çoxsaylı əvəzetmələrdən sonra oyun planında geriləmə baş verdi. Nəticədə rəqib qapımıza iki dəfə yol tapdı. Əlbəttə, qələbələr qazansaq, daha yaxşı olardı. Amma mənim üçün əsas futbolçularımın belə turnirlərdə tez-tez iştirak edib beynəlxalq təcrübə toplaması, peşəkarlaşmasıdı. Bu həm gənc oyunçuların inkişafı, həm də əsas millimiz üçün yeni simaların yetişməsi baxımından vacibdi. Serbiyada təşkil olunacaq Avropa çempionatının seçmə mərhələsinə hazırlıq üçün də bu turnir faydalı oldu. Qarşıda daha 3 toplanış və yoldaşlıq görüşləri var. Maksimum yaxşı hazırlaşıb seçmə mərhələyə hazır olmalıyıq".