Vüqar Əsgərli komandadan razı qalıb
19 yaşadək qadınlardan ibarət yığma Şimali İrlandiyada keçirilən AÇ-nin seçmə mərhələsinin B liqasında çıxışını ötən həftə başa vurdu.
Üç oyunun ikisində məğlub olub, birində qalib gələn komanda növbəti mərhələyə yüksələ bilmədi. Yarışla bağlı təəssüratını öyrənmək üçün U-19-un baş məşqçisi Vüqar Əsgərli ilə danışdıq: “Qrupumuzda Farer adaları ilə yanaşı, Malta və Şimali İrlandiya çıxış edirdi. İlk görüş Farer adalarına qarşı oldu. İqlim şəraiti bizim üçün çətin olsa da, bu oyunda qızlar tapşırıqları yaxşı icra etdilər və 2:0 qalib gəldik. İkinci qarşılaşmada Malta ilə üz-üzə gəldik. Görüşə yaxşı başlamağımıza, hesabı açmağımıza baxmayaraq, 2-ci hissədə texniki səhvlər üzündən iki qol buraxaraq uduzduq. Son oyunumuz Şimali İrlandiyaya qarşı oldu. Qadın futbolunda yüksək nəticələr göstərən ölkə təmsilçisidi. Bizim üçün yaxşı təcrübə oldu. Yaxşı mübarizə apardığımız matçda 0:1 hesabıyla uduzduq. Ümumilikdə qızlardan razı qaldım. Pandemiya üzündən uzun müddət oyun təcrübəmiz yox idi. Buna baxmayaraq, komanda baxımlı oyun göstərdi”.
SƏNƏM FƏRHADOVA
