Karlo Ançelotti ilə bağlı ehtimallara praktiki olaraq son qoyulub. O, “Real”ın baş məşqçi vəzifəsində qalacaq.

"Football-plus.az" xəbər verir ki, “Marca” qəzetinin yaydığı məlumata görə, klub rəhbərliyi iki həftə əvvəl məşqçiyə onun növbəti mövsümdə də komandanın başında qalacağını bildirib. Halbuki bir çox mənbələr 63 yaşlı məşqçinin La Liqada çempionluq yarışını praktiki cəhətdən əzəli rəqib “Barselona”ya uduzduğu üçün yayda istefaya göndəriləcəyini iddia edirdi. Lakin İspaniya kubokunun qazanılması bossların don Karloya etimadını davam etdirməsinə səbəb olub.

Ançelotti madridliləri 2021-ci ildən çalışdırır. İtaliyalı mütəxəssisin müqaviləsinin müddəti 2023/24 mövsümünün sonuna qədərdi. Xatırladaq ki, “Real” bu mövsüm onun rəhbərliyi altında Avropa Superkubokunda və Klublararası Dünya Çempionatında da uğur qazanıb. Komanda Çempionlar Liqasının yarımfinalında “Mançester Siti” ilə qarşılaşacaq.