“Formula-1” üzrə dünya çempionatında daha bir mərhələ arxada qaldı.

"Football-plus.az" xəbər verir ki, Bakı mərhələsinin qalibi “Red Bull”un pilotu Serxio Peres oldu. Onun komanda yoldaşı, DÇ-nin favoritlərindən biri Maks Ferstappen son müsahibəsində bəzi aktual sualları cavablayıb.

- “Formula-1” karyeranızda 81-ci dəfə fəxri kürsüyə yüksəlməklə bu göstəricidə əfsanəvi Ayrton Sennanı arxada qoyduz. Braziliyalı 80 dəfə finişə ilk “üçlük”də çatmışdı. Həm son yarışı, həm də ümumilikdə Bakıda keçirdiyiniz həftəsonunu necə dəyərləndirərdiz?
- Bu mərhələ ümumilikdə bir qədər təlaşlı alındı, ancaq indiki formatda bunu gözləmək olardı. Sırf yarışdan danışırıqsa, ilk bölümdə təkərlərlə iş baxımından daha aqressiv davranmalıydım. Düşünürəm ki, hədsiz ehtiyatlıydım. Məhz bu üzdən Serxio düz arxamda gəlirdi, ardından pit-stopa qərar verdim. Demək istəyirəm ki, hansısa maşının dayandığını görəndə düşündüm ki, onun pilotu, sadəcə, əyləci basıb. Həmin epizodu təhlil etmək lazım gələcək, axı indi aydındı ki, həmin maşını (Nik de Vrisin sürdüyü “Alfa Tauri”ni – red.) görə bilməzdim, hərçənd görünürdü ki, təkərlərdən biri zədələnib. Pit-stop qərarı nəticəmə təsir etdi. Təhlükəsizlik maşını trassı tərk edəndən sonra Serxioya pressinq etməyə, ona çatmağa (Ferstappen 3-9-cu, Peres 10-51-ci dövrələrdə liderlik edib – red.) çalışdım, hansısa məqamda buna yaxın idim. Ancaq Serxionu haqlamaqdaykən təkərlərim “təslim oldu”, bunun belə tez baş verəcəyini gözləmirdim. Bir sözlə, hansısa məqamda, sadəcə, 2-ci yeri qorumağa qərar verdim ki, təkərlər tam sıradan çıxmasın. Döngələrdə optimal balans tapmaq çox çətin idi.

Bakı trassında isə hər şeyi düz etsən, məhz döngələrdə əməlli-başlı fərq açmaq olur. Məndə əvvəlcə dönmənin yetərincə olmaması, ardından artıq olması üzündən problem yarandı. Yarış boyunca tənzimləmələri dəyişməyə, maşının daha düzgün davranışına nail olmağa çalışdım. Düşünürəm ki, sonda heç də pis olmayan çıxış yolu tapdım, son 10 dövrəni daha inamla qət etdim. Son nəticədə finiş xəttinə ikinci çatmağımdan razıyam. Əlbəttə, adam həmişə qalib gəlmək istəyir. Ancaq bəzən həftəsonunun belə nəticələnməsi də lazımdı. Axı belə nəticələr da pilota çox şey öyrədir, maşını daha yaxşı anlamağa yardım edir.

- İlk “üçlük”də qərarlaşan pilotların maşınlarının tempini necə müqayisə edərdiz? Nə düşünürsüz, “Ferrari” hansısa mənada geriliyi azalda bildimi?
- Güman edirəm ki, yetərincə sürətli maşınımız var. Dəqiq xatırlamıram, ancaq məncə, finişdə onları 20 saniyə qabaqladıq. Əlbəttə, bütün gücümüzlə hücum edirdik, ancaq bizdən arxada olanlar da “boşalmağa” imkan vermirdi. Maşını daha sürətli etməyə çalışırıq, axı bizi uzun mövsüm gözləyir, irəlidə ən müxtəlif trasslarda yarışlar olacaq. Ancaq Bakıdakı həftəsonunu komandamız üçün ümumilikdə müsbət dəyərləndirirəm.

- Dediniz ki, təhlükəsizlik maşını trassa daxil olana qədər Nik de Vrisin maşınının dayandığını gördüz, ancaq onun hərəkəti davam etdirə biləcəyinə əmin deyildiz. Belə anlamaq olar ki, vəziyyəti qiymətləndirməli olan komandanızın təhlükəsizlik maşınının trassa çıxacağını öncədən görməli olmasına bel bağlamısız. Məhz bu üzdən komanda ilə birgə epizodu təhlil etməli olduğunuzu deyirsiz?
- Bəli, onu nəzərdə tuturam ki, dayanan maşını gördüm, ancaq ekranda gördüm, belədə maşının təkərlərinin yerində olub-olmadığını dəqiqləşdirmək mümkün deyildi. Demək istəyirəm ki, komandada bu epizodla bağlı daha geniş bilgi olmalıydı. İndi hər şeyi təhlil etməli və həmin anda başqa nəsə edə bilmək imkanımızın olub-olmadığını üzə çıxarmalıyıq.

- Serxio sizdən cəmi 6 xal geri qalır – bu məqam ardıcıl 3-cü dəfə dünya çempionluğunu qazanmaq planınıza nə dərəcədə təhlükə yaradır? Dünya çempionluğu uğrunda yalnız ikiniz mübarizə aparacağınız təqdirdə normal münasibətləri qoruya biləcəksizmi?
- Birmənalı şəkildə indi ən sürətli maşınlar bizdədi. Ancaq əvvəllər də belə vəziyyətdə olmuşam, indi hər şey sizin nə dərəcədə sabit çıxış edəcəyinizdən asılıdı. Bunu hər birimiz anlayırıq. Mövsüm uzundu, bizi irəlidə bir-birindən kəskin şəkildə fərqlənən trasslarda mübarizə gözləyir. Ancaq özünüz də görürsüz ki, Serxionun bu il, həqiqətən də, ciddi niyyəti var. O, çox yaxşı çıxış edir, bunu görmək xoş mənzərədi. Serxio get-gedə daha inamla yarışır, “Red Bull”da onun üçün hər şey rahatdı, bu da bizim xoşumuza gəlir. Mənə elə gəlir ki, trassdan kənarda da onunla yaxşı vaxt keçiririk.

Və daha bir məqamı qeyd etməliyəm: kimsə vəzifəsinin öhdəsindən əla gəlirsə, bunu etiraf etmək və dəyərləndirmək lazımdı. İndi məhz belə proses yaşanır. Mövsümün sonuna qədər rəqabət aparmağımız normaldı. Həyatımız boyunca bununla məşğuluq.