Misli premyer-liqasında sonuncu yer uğrunda mübarizə pik həddə çatıb. 4 komandadan ikisi çempionatı tərk etməyə daha yaxındı. Söhbət “Səbail”lə “Şamaxı”dan gedir. Lakin bu, futboldu. Mövsümün sonuna hələ 4 tur var. İstənilən nəticə qeydə alına bilər.

Gərginlik pik həddə çatdığı dövrdə redaksiyamıza maraqlı informasiya daxil olub. Sən demə, AFFA-nın 2023/24 mövsümü ilə bağlı planı fərqlidi. Federasiya qarşıdakı “futbol ili”ndə komandaların sayını artıracaq. Premyer-liqada 12 komanda çıxış edəcək. İki səbəb bunu şərtləndirib.

1. Ölkə futbolunun coğrafiyasını genişləndirmək
Misli premyer-liqasının 2022/23 mövsümü digər illərə nisbətən daha maraqlı və baxımlı keçir. Çünki həm Tovuz, həm Gəncə, həm də Şamaxının komandaları çempionatda iştirak edir. Bu da oyunların daha çox izlənilməsinə səbəb olub. Federasiya başbilənləri və PFL kütləviliyi daha da artırmaq üçün belə qərarın verilməsini doğru sayır.

2. “Şamaxı” layihəsinin SOCAR rəhbərliyi tərəfindən bəyənilməsi
Bildiyiniz kimi, “şirlər” bu mövsüm ancaq yerli futbolçularla premyer-liqada çıxış edir. Onların əzmkarlığı və yaxşı performans sərgiləmələri SOCAR rəhbərliyinin xoşuna gəlib. Şirkət daha bir komandanın premyer-liqada yerli futbolçulardan təşkil olunmasını istəyir. Bu səbəbdən də 1-ci diviziondan iki komandanın elitaya gətiriləcəyi gözlənilir. “Araz Naxçıvan” bu vəzifənin öhdəsindən gəlib. Hazırda 3-cü pillədə qərarlaşan “Zaqatala” isə premyer-liqada çıxış edəcək ikinci yeni komanda olacaq. Yeni kollektiv də ancaq yerli futbolçulardan formalaşacaq. AFFA rəhbərliyi növbəti mövsüm bu komandalardan hansısa birinin premyer-liqanı tərk etmək ehtimalını da nəzərə alıb. Belə olan halda digəri qarşıdakı illərdə elitada yenə yerli uşaqlarla çıxış edəcək.
Bildiyiniz kimi, AFFA premyer-liqada mübarizə aparan hər kluba 3 milyon manat ayırır. Federasiya rəsmiləri əsas sponsoru əlavə 6 milyon manat ayırmağa razı alıb.

Premyer-liqada 12 komanda olacağı halda 1-ci divizionda yenə 10 kollektiv iştirak edəcək. Bu səbəbdən də Region Liqasında çıxış edən 4 yox, 6 klubun aşağıda dəstədə iştirakına şərait yaradılacaq.

İLKİN SULTANLI