Qəbələ şəhər stadionun durumu və hava oyunun keçirilməsi üçün ideal idi.

“Qarabağ”ın gəlişi azarkeşlərə də təsir etmişdi. Düzdü, protokolda 1200 nəfər qeyd olunub. Amma azarkeş sayının bundan bir qədər artıq olduğu görünürdü.

Görüş maraqlı məcrada başladı. Hər iki komanda ilk dəqiqələrdə açıq futbol sərgiləyirdi. “Qəbələ”də Renatonun yoxluğu müdafiədə problem yaradırdı. Zubir – Şeydayev – Qurbanlı “üçlüy”ü “qırmızı-qaralar”ın arxa xəttinə çətin anlar yaşadırdı. Qapı istiqamətinə ilk zərbəni də “köhlən atlar” vurdu. Matçın ilk dəqiqəsində Zubir reyd edərək Səlahətin sayıqlığını yoxladı. İlk yarım saat ərzində ərazi üstünlüyü ağdamlılarda olsa da, hesabı “Qəbələ” açdı. Cərimə zərbəsindən sonra “Qarabağ”ın müdafiəsi səhvə yol verdi. Alimi Şeydayevdən qayıdan topu qapıdan keçirdi. Ağdamlılar oyuna meydanın mərkəzindən başlayandan sonra penalti vurmaq hüququ əldə etdi. Məqsəd cərimə meydançasında Elvini itələyərək yerə sərdi. Kamal Umudlu oyunu davam etdirsə də, VAR-ın müdaxiləsindən sonra 11 metrlik cərimə zərbəsi təyin etdi. Topun arxasına keçən Şeydayev hesabı bərabərləşdirdi.

İkinci hissəyə “köhlən atlar” üstün başladı. “Qarabağ” Elmar Baxşıyevin komandasının taktikasını anlamışdı. Ağdamlıların müdafiəçiləri “qırmızı-qaralar”ın hücum xəttinə rahat oynamağa imkan vermirdi. 56-cı dəqiqədə Qurban Qurbanovun komandası hesabda önə keçdi. Alimidən topu “oğurlayan” Musa Andradeyə ötürmə etdi. Kabo Verdelinin ara ötürməsindən sonra isə forvard özü hücumu qolla tamamladı.

Bundan sonra “Qəbələ”nin futbolçuları bir qədər fəallıq göstərməyə başlamışdı ki, müdafiədəki səhvlər komandaya baha başa gəldi. 64-cü dəqiqədə Elvinin ötürməsindən sonra top cərimə meydançasında Muradın əlinə dəydi. Kamal Umudlu yenə “davam” desə də, VAR-a nəzarət edən Rəşad Əhmədov fərqli fikirdə idi.

Mingəçevirlinin təkidi ilə baş hakim epizodu yenidən izləyərək penalti təyin etdi. Topun arxasına keçən Ramil dublunu rəsmiləşdirdi. Bundan sonra Elmar Baxşıyev bəzi dəyişikliklər etdi. O, jokeri Ülvini meydana buraxdı. Hücumçu 79-cu dəqiqədə fərqləndi. Lakin həm yan xətt, həm də VAR hakimləri oyundankənar vəziyyət qeydə aldı. Matçın son dəqiqəsində Ülvinin müdaxiləsindən sonra top Elvinin əlinə dəydi. Kamal Umudlu yenə penalti təyin etdi. Bu dəfə isə VAR-da əyləşən Rəşad Əhmədov topun Elvinin əlinə dəymədiyini bildirərək, baş hakimin qərarını dəyişməsini istədi.

Beləliklə, maraqlı və sürətli keçən görüşdə “Qarabağ” “Qəbələ”ni 3:1 hesabıyla məğlub etdi.

Gözdən qaçmadı

* Görüş başlamamış Qəbələ şəhər stadionunda elektrik enerjisi kəsildi. Dərhal generatorlar işə düşdü. Enerjinin verilməsi matçın başlamasına 20 dəqiqə qalmış bərpa olundu.

* “İmarət Tayfa” fanklubunun Qəbələyə gəlməməsi diqqətdən yayınmadı.

* Hakimin start fitindən öncə “Qarabağ Ordu” fanklubu Luka Quqeşaşvilinin adını xüsusi səsləyərək alqışladı.

Maraqlıdı...

// Qurban Qurbanov baş məşqçi karyerasında 700-cü oyununu keçirib. 51 yaşlı mütəxəssisin yubileyi “Qəbələ” ilə görüşə təsadüf edib. Bu, Qurbanovun bütün komandalarda və turnirlərdə ümumilikdə 700-cü matçı kimi tarixə düşüb. Burda cəza və ya digər səbəbdən texniki zonadan yox, kənardan yetirmələrinə rəhbərlik etdiyi görüşlər də nəzərə alınıb. Qurbanov baş məşqçi karyerasına 2006-cı ilin yayında başlayıb. O, karyerası ərzində üç komandaya rəhbərlik edib. “Qarabağ”dan başqa, “Neftçi”də 38, millidə 12 oyunda iş başında olub. “Qəbələ” ilə qarşılaşma həm də “Qarabağ”ın “sükanı arxasında” 650-ci oyun olub. Mütəxəssis 2008-ci ilin yayından çalışdırdığı Ağdam klubunu səfər matçına qədər 649 görüşə çıxarmışdı. Qeyd edək ki, Qurbanovun baş məşqçi kimi debütü 2006-cı il avqustun 6-da reallaşıb. Onun rəhbərlik etdiyi “Neftçi” “Gənclərbirliyi” ilə ev oyununda 6:1 hesabı ilə qalib gəlib. Mütəxəssis bundan 2 il 3 gün sonra “Qarabağ”da debüt edib. Ağdamlılar səfərdəki çempionat matçında “Bakılı”ya qalib gəlib – 2:1.

// “Qarabağ” Azərbaycan çempionatlarında 1400-cü qolunu vurub. Bu, 25-ci tura təsadüf edib. 1992-ci ildən keçirilən çempionatın daimi iştirakçısı “Qəbələ” ilə səfər oyununa qədər 1398 dəfə fərqlənmişdi. Qəbələ şəhər stadionunda qonaqların vurduğu ikinci top 1400-cü kimi tarixə düşüb. Yubiley qolunun müəllifi Musa Qurbanlı olub. “Qarabağ” ölkə çempionatında 1400 və ya daha çox qol vuran ikinci komandadı. Bu göstəricidə yalnız “Neftçi”dən geri qalan “Qarabağ” 878-ci matçında yubileyə nail olub. Qol sayını 1401-ə çatdıran komandanın orta məhsuldarlığı 1,60-a bərabərdi. Qeyd edək ki, “Qarabağ”ın ölkə çempionatlarındakı ilk qolunu 1992-ci il mayın 3-də Mehman Alışanov vurub. Sabirabad “İnşaatçı”sı ilə ev görüşündə fərqlənən futbolçu həm də yarışın tarixində ümumilikdə ilk qolun müəllifidi.

İLKİN SULTANLI