Kim Min Çje bir müddətdən sonra “Napoli”ni tərk edəcək. Amma onun İtaliya klubundan birdəfəlik ayrılacağını düşünməyin.

"Football-plus.az" xəbər verir ki, koreyalı müdafiəçi hərbi xidmətə yollanacaq. İtaliya mətbuatının yaydığı xəbərə görə, 26 yaşlı futbolçu bu ilin iyun və iyul aylarını əhatə edən üçhəftəlik xidmət keçəcək.

Qeyd edək ki, Kim 2018-ci ildə Koreya millisi ilə Asiya çempionatının qalibi olsa da, hərbi xidmətdən tam azad edilməyib. Qaydalara görə o, 3 həftəlik təlimdə iştirak etməlidi. Yeri gəlmişkən, “Tottenhem”in yarımmüdafiəçisi Son Hın Min də 2020-ci ildə bu təlimə qoşulmuşdu.

Xatırladaq ki, Min Çje 2022/23 mövsümündə “Napoli”nin heyətində 40 oyuna çıxıb, 2 qol vurub və 2 məhsuldar ötürmə verib.