''Fənərbaxça''nın forvardı Mergim Berişa üçün mövsümün uğurlu keçdiyini söyləmək olmaz.

24 yaşlı futbolçu 31 rəsmi oyunda cəmi 7 dəfə fərqlənə bildi. Amma onun vurduğu qollardan biri Avropa Liqasında mövsümün ən gözəl qolu seçilib! Bu xəbəri turnirin rəsmi ''tvitter'' səhifəsi paylaşıb. Söhbət onun səfərdə ''Antverpen''ə vurduğu qoldan gedir. Qrup mərhələsinin 4-cü turu çərçivəsində keçirilən həmin görüşdə İstanbul nəhəngi 3:0 hesabıyla qalib gəlmişdi. Berişa 29-cu dəqiqədə coxgedişli kombinasiyanın sonunda mükəmməl akrobatik zərbə ilə topu tora göndərərək yekun nəticəni müəyyənləşdirmişdi. Ən gözəl 10 qol siyahısında ikinci pilləni ''Srvena Zvezda''lı Marko İvaniçin ''Ludoqorets''ə, üçüncü pilləni isə ''Ayntraxt''lı Rafael Borrenin ''Barselona''ya vurduğu qol tutub.

''Fənərbaxça''dan söz düşmüşkən, bir xəbəri də diqqətinizə çatdıraq. Bu mövsüm sərgilədiyi oyunla ''Everton'' və ''Napoli'' başda olmaqla Avropa klublarının diqqətini cəlb edən Kim Min Çje vətənə olan borcunu yerinə yetirmək, yəni hərbi xidmət keçmək üçün Koreyaya yollanacaq. Koreya qanunlarına görə vəzifəsindən və nüfuzundan asılı olmayaraq, ölkədə 21-24 yaş aralığında hər kəs üçillik hərbi xidmət keçməyə məcburdu. Amma bəzi şəxslərə ölkə qarşısında borcunu belə desək, artıqlaması ilə yerinə yetirdiyi üçün müəyyən güzəştlər edilir. 25 yaşlı Kim Min Çje 2018-ci ildə yığmanın heyətində Asiya Oyunlarının qalibi olduğu üçün onun hərbi xidmət müddəti 3 ildən 3 həftəyə düşüb. Yəni istedadlı müdafiəçi bu yay vətənində 3 həftəlik hərbi xidmət keçəcək.

2020-nin mayında ''Tottenhem''in ulduzu Son Hın Min də 3 həftəlik xidmət keçmişdi. Çünki o da 2018-dəki heyətdə idi. Kim Min Çjenin geridə qoyduğumuz mövsümdə ''Fənər''də 39-u start heyətində olmaqla 40 rəsmi oyuna çıxdığını və 1 qol vurduğunu bildirək. ''Sarı-lacivərdlilər'' bu futbolçunu ötən yay 3 milyon avroya ''Beytsin Qoyan''dan transfer ediblər.