“Bu iki komanda arasında baş tutan oyunlar həmişə gərgin keçir. Son vaxtlar “Qarabağ”ın çıxışında geriləmə var. Ağdam klubu çempionatın əvvəlindəki performansını göstərə bilmir. Hiss olunur ki, yeni transferlər komandadan ayrılanlara nisbətdə daha süst oyun sərgiləyir. Səbəblər haqda çox danışmaq istəmirəm. Əlbəttə, burda futbolçuların zədələnməsi də sözünü deyir. Bu problem onların komandaya uyğunlaşmasına mane olur.

“Sabah”, “Zirə”, hətta “Şamaxı” ilə oyunda göründü ki, “Qarabağ”da problemlər var. Düzdü, Ağdam klubu dominantlıq edirdi. Lakin müdafiədə kobud səhvə yol verirdilər. “Şamaxı” “köhlən atlar”ın müdafiəçilərinin səhvlərindən istifadə edə bilmədi. Oyun da bu üzdən 1:0 Ağdam təmsilçisinin xeyrinə başa çatdı. Söhbət təkcə “Şamaxı”dan getmir. “Turan Tovuz”, “Səbail” kimi komandalar da “Qarabağ”ın müdafiəçilərini səhvlərə məcbur edir.

Ağdam təmsilçisinin arxa xəttində həqiqətən problem var. “Sabah”la oyunda da bu aşkar göründü. Düzdü, həmin matç olduqca sürətli keçdi. Hər iki komanda açıq futbol sərgilədi.

“Neftçi” ilə oyuna gəlincə, “ağ-qaralar” doğma meydanda rəqibi qəbul edəcək. Bakılılar kubokda “Turan Tovuz” üzərində əzmkar qələbə qazanaraq finala adladı. “Bakcell Arena”dakı oyunda bizi maraqlı mübarizə gözləyir. Hər nə qədər “Qarabağ”ın müdafiəsindəki problemləri qabartsaq da, hücum potensialını da unutmaq olmaz. Qəbul edək ki, Ağdam təmsilçisi bu baxımdan ölkə çempionatının ən güclüsüdü.

Ola bilər ki, rəqibə çoxlu qol imkanı versinlər. Amma bunu da unutmayaq ki, rəqiblərdən daha çox hücum qururlar. Əminəm ki, komandanın bu oyunda çoxlu qol şansları olacaq. Bunları dəqiq dəyərləndirsələr, qələbə qazanacaqlar. Baxmayaraq ki, görüş “Neftçi”nin stadionunda keçiriləcək, amma diqtə edən tərəf Qurban Qurbanovun komandası olacaq. Düşünmürəm ki, “ağ-qaralar” bu görüşdə topu özündə çox saxlasın. “Qarabağ” dominantlıq edəcək. Amma qol imkanlarını nə qədər reallaşdıra biləcəklər, bax, bunu bilmirəm.

Düşünmək olar ki, ağdamlılar psixoloji cəhətdən sınıq vəziyyətdədi. Amma bir qol onların vəziyyətini düzəldə bilər. Bu səbəbdən də “Qarabağ”I şanslı tərəf sayıram. Düşünmürəm ki, bu qədər qol epizodu yaradan komanda ardıcıl görüşlərdə məğlub olsun. “Neftçi” də “Qarabağ”a çətin anlar yaşadacaq. Amma Ağdam klubunun hücum xətti rəqiblə müqayisədə daha güclüdü. Bəlkə də daha keyfiyyətli və təcrübəlidilər. “Qarabağ”ın cinah futbolçularının “Neftçi”nin müdafiəçilərinı əməlli-başlı problemlər yaradacağını düşünürəm”.