"Çempionat sona yaxınlaşdıqca komandalarda gərginlik hiss olunur. İkinci beşlikdə bunu daha çox görmək olur. Çünki 1 komanda elitanı tərk edəcək. Bu da əlavə çətinlik yaradır kollektivlərə. İkinci beşlikdə vəziyyət elədi ki, hər an komandalar mövqeyi dəyişə bilər.

Uzun müddət ki, "Səbail" sonuncu pilləni tərk edə bilmir. Bu günkü "Kəpəz" - "Sumqayıt" matçı çox vacibdi. Qonaqlar qalib gəlsə, "Turan Tovuz"la gəncəlilərə yaxınlaşacaq. Samir Abasovun komandası bu gün qələbə qazansa, gərginliyi bir az üzərindən ata bilər. Ümumilikdə hər iki komanda üçün çox vacib oyundu. Kimin yaxşı, kimin pis formada olduğunu söyləyə bilmərəm. "Kəpəz" yaxşı oyun sərgiləyir. "Sumqayıt" "Qəbələ"yə məğlub olsa da, əla performans sərgilədi. Bu səbəbdən də açıq-aşkar kimin favorit olduğunu söyləmək olmur. Hər iki komanda istəyəcəl ki, xal ehtiyatını atırsın.

"Sabah" - "Şamaxı" matçı da maraqlı keçəcək. Çoxu düşünə bilər ki, artıq "Qarabağ" çempiondu. Amma bunu hələ söyləmək olmaz. Çünki Ağdam təmsilçisinin "Neftçi" ilə çətin oyunu var. "Sabah" qalib gəlsə, "Qarabağ" uduzsa, çempionluq mübarizəsi daha da qızışacaq. "Bayquşlar" demək olar ki, ikinci yeri təmin edib. Çempionluq mübarizəsini sona kimi aparmaq istəyəcək. "Şamaxı" isə elitada qalmaq istəyir. Bu səbəbdən də sona kimi mübarizə aparacaq. Bu gün bizi olduqca gərgin və maraqlı 2 oyun gözləyir".