“Elçin müəllimin müsahibəsi ilə tanışam. Fikirlərində haqlıdı. Bilirsiz ki, növbəti mövsüm əvəzedicilərlə 1-ci divizion ayrılacaq. Aşağı dəstədə 10 komandadan ibarət çempionat keçirilməlidi. Yarışın təşkili üçün müəyyən şərtlər var. Bunu da Elçin müəllimlə birgə məsləhətləşib yazmışdıq. Əslində şərtlər o qədər də ağır deyil. Lakin klublardan müəyyən şərtlər tələb etdik ki, ilk ildən bəzi məsələləri yoluna qoyaq. Növbəti ildən tələblər daha da sərtləşdirilə bilər. Amma indi istəklər o qədər də ağır deyil. Təbii ki, ilk şərtimiz stadionla bağlıdı. İnfrastruktura xüsusi önəm veririk. Burda müəyyən məsələlər var. Paltardəyişmə, iclas, AFFA nümayəndəsinin otağı, tribunalar, çəkiliş platforması yerində olmalıdı. Bunlar minimal tələblərdi.

Bundan başqa, istəyirik ki, klubun normal strukturu olsun. Kadr-inzibati məsələlər var. Klubun İdarə Heyəti formalaşmalıdı. Müəyyən vəzifələr var ki, onların olmasını tələb edirik. Bunlar klubun meneceri, rəhbərliyi, təhlükəsizlik xidməti əməkdaşları, lisenziyalaşdırma üzrə menecer, FİFA TMS meneceri, danışılmış oyunlar üzrə şəxslərdi. Düzdü, bütün vəzifələrin bir şəxsə həvalə olunmasını da istəmirik. Birinci divizionda maliyyə xərcləri başqadı. Bir əməkdaş 2-3 vəzifəni yerinə yetirə bilər. Lakin istəyirik ki, bir az təcrübəli olsun. Futbolu sevən hər kəs bu işin öhdəsindən gələ bilər. Bundan başqa, klubun məşqçi korpusu formalaşmalıdı. Orda müəyyən kateqoriyalar var. Baş məşqçinin B, köməkçilərin C kateqoriyasının olması kifayətdi. Hələ ki bu mövsümdən 1 yaş qrupu üzrə uşaq komandasının olmasını istəyirik. Bu tələb gələcəkdə dəyişə bilər. Həmin məşqçinin kateqoriyasının da ən azı D və ya C olması lazımdı. Bu bizim üçün əsas məsələlərdən biridi. Bilirsiz ki, hər şey təməldən başlayır. Bundan başqa, bəzi problemlərin yaşanmaması üçün klublar tərəfindən bank zəmanəti olmalıdı. Düşünürəm ki, qoyduğumuz şərtlər o qədər də ağır deyil”.

“Stadionlarla bağlı problem var. Təəssüf ki, arenaların durumu o qədər də ürəkaçan deyil. 2004-cü ildəki futbol ajiotajını nə qədər tənqid etsək də, o dövrdə heç olmasa, stadionlar tikilib. İndi həmin arenaların durumu qənaətbəxş sayılmasa da, ən azı təmir olunması üçün o qədər də böyük xərc lazım deyil. Klubların qarşısına qoyulan şərtlər bundan ibarətdi. Çalışacağıq ki, ən layiqli komandalar 1-ci divizionda çıxış etsin. Sonda onu da qeyd edim ki, bizim üçün ən vacib məsələ iştirakçının bölgə təmsilçisi olmasıdı”.