Dünən La Liqanın 30-cu turunda ''Barselona'' ''Atletiko''nu 1:0 hesabı ilə yenərək mövsümün ən vacib qələbələrindən birini qazandı.

"Football-plus.az" xəbər verir ki, Madrid nəhənginin La Liqada 6 oyunluq qələbə və 13 oyunluq məğlubiyyətsiz seriyası qırıldı.

Komanda sonuncu dəfə 16-cı turda, yanvarın 8-də məhz elə ''Barselona''ya uduzmuşdu (0:1). Dünənki qarşılaşmanın son anlarında mübahisəli epizod yaşandı. 90-cı dəqiqədə Moratanın baş zərbəsindən sonra top Busketsin əlinə dəysə də, hakim Xose Mariya Sançes Martines nə penalti təyin etdi, nə də VAR-a baxmağa ehtiyac duydu.

''Atletiko''nun çoxdandı, penalti qazanmaması İspaniya mətbuatında müzakirələrə səbəb olub. Sən demə komanda ardıcıl 33 turdu penalti qazanmır və bu, klub tarixinin yeni antirekordudu! Son penalti 350 gün öncə - ötən mövsümün 35-ci turunda ''Real'' ilə derbidə qazanılıb. Buna qədər ''hindular'' maksimum 32 tur penalti qazanmamışdılar. Bu hadisə 1941/42 və 1942/43 mövsümlərində baş vermişdi.