Misli premyer-liqasında 31-ci tura yekun vurulub.

"Football-plus.az" xəbər verir ki, "Sumqayıt" "Qəbələ"ni qəbul edib - 2:3. Oyundan sonra qonaqların çalışdırıcısı Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:

- İkinci hissədə komanda sanki oyundan qopmuşdu. Bunun səbəbi nə idi?
- Oyunu hissələrə bölməzdim. Biz qopmamışdıq. Sadəcə "Sumqayıt" çox yaxşı idi. Rəqib üstümüzə gəlirdi, təzyiq göstərirdi. Oyunun bir hissəsindən onlar bizdən üstün idilər. 0:2-dən sonra geridönüş etmək çox ağırdı. Sevinirəm ki, komandamda ruhu sağlam insanlar var.

- İlk sayılmayan qolunuzdan sonra çox aqressiv reaksiya verdiniz. Bu, nə ilə bağlı idi?
- Mənim aqressiyamı futbolçularım normal qəbul edirlər. Etdiyim jestin onlara heç bir təsiri olmur.

- Müsbət təsir etdi sanki...
- Ola bilər. Bəlkə də təsiri olub. Hakim epizodu sona kimi davam etdirə bilərdi. Amma qərar qəbul edən odu.

- Ardıcıl iki matçda eyni ssenari ilə geridönüş etdiniz. Bu haqda nə deyə bilərsiz?
- Kənardan elə görünür ki, fiziki durumumuz yaxşıdı deyə bunu edə bilirik. Aylar öncə bizim fiziki durumun aşağı olduğunu müzakirə edirdilər. Bununla bağlanıram. Futbol detallardan ibarətdir. Bəzən alınır, onu nümayiş etdirirsən. Bəzən də istədiyini meydanda edə bilmirsən. İki oyunda geridönüş etməyi futbolçuların iradəsinə bağlayıram.

- Üç gün sonra kubokun cavab görüşü var. Komanda yorğunluğu üzərindən ata biləcək?
- Öncədən də bilirdik ki, bu period bizim üçün ağır keçəcək. Amma tək biz bu durumda deyilik. İndiki durumda heyətimiz genişdi, rotasiya etmək mümkündü.

- Əvvəllər komandanız qol epizodları yaradırdı, amma dəyərləndirə bilmirdi. Son matçlarda isə futbolçular fürsətlərdən yararlanmağı bacarır. Artıq bunun çarəsini tapdığınızı düşünmək olar?
- Yox. Futbolun sirr çubuğu yoxdu. Sadəcə oyun oyundan fərqlidi.