"Şamaxı" - "Kəpəz" qarşılaşmasını izləyənlər arasında Gəncə futbolunun canlı əfsanəsi, "sarı-göylər"in idman direktoru Mehman Allahverdiyev də vardı.

"Football-plus.az" olaraq onun matçla bağlı təəssüratını öyrəndik.

- Oyunla bağlı fikirləriniz maraqlıdı...

- Bərabərsəviyyəli oyun keçdi. İlk hissədə daha yaxşı çıxış etdik. Fasilədən sonra meydan sahibləri təzyiqi artırsa da, komanda olaraq yaxşı qapandıq. Qapıçımız da sağ olsun, rəqibin son dəqiqələrdə əlverişli vəziyyətdən fərqlənməsinə mane olaraq səfərdən 1 xalla ayrılmağımızda xüsusi xidməti oldu. Bu xal premyer-liqada qalmağımız üçün çox vacib idi. Bütün "Kəpəz" kollektivinə təşəkkür edirəm.

- Ev oyunları Qəbələdə keçirmək sizə çox mane olur?

- Əlbəttə, mane olur. Məşqimizi Gəncədə edirik, sonra da ev oyununu keçirmək üçün Qəbələyə gedirik. Məsafə qət edəndə də istər-istəməz futbolçularda yorğunluğa səbəb olur. Bu da oyunlarda təsirini göstərir.

- Mayda heç olmasa, Gəncədə oyunlarınızı keçirməyə icazə veriləcək?

- Otu əkmişik. Amma yetişib çıxması vaxt aparacaq. Açığı, bu mövsüm Gəncədə oyun keçirəcəyimizə inanmıram. Böyük ehtimalla doğma publika önündəki oyunumuz növbəti mövsümə qaldı.

ABDULLA İSMAYILOĞLU