UFC versiyası üzrə yüngül çəkidə sabiq dünya çempionu – dağıstanlı Həbib Nurməhəmmədov qarışıq döyüş növlərində (MMA) əfsanə hesab etdiyi idmançıların adlarını açıqlayıb.

"Football-plus.az" xəbər verir ki, o, bu haqda “tvitter” hesabında paylaşım edib.

Həbib Fyodor Yemelyanenko ilə ABŞ-dan olan Con Consu ilk pillədə göstərib. Kanadalı Jorj Sen-Pyer siyahıda 2-ci, braziliyalı Anderson Silva 3-cü olub.

İlk "10-luq"da ABŞ-dan olan digər döyüşçülər Demetrius Conson, Daniel Kormye, Henri Sexudo, braziliyalı Joze Aldu, nigeriyalılar Kamaru Usman ilə İsrael Adesanya, ABŞ idmançısı Bi Cey Penn də yer alıb.

Braziliyalı Roys Qreysi 11-ci, ABŞ-dan olan Rendi Kutyur və Keyn Velaskes 12-ci, onların həmyerliləri Dan Hendersonla braziliyalı Maurisiu Rua 13-cü, Xorvatiyalı Mirko Filipoviç və ABŞ döyüşçüsü Stipe Mioçiç 14-cü, ABŞ-ın digər idmançıları Dominik Krusla Frenki Edqar 15-ci sırada göstərilib.