Fiziyev qaldığı evin kirayə haqqını ödəmir
Azərbaycanın yüngül çəkidə MMA döyüşçüsü Rafael Fiziyev Taylandda evin kirayə haqqını ödəməkdən imtina etməkdə ittiham olunub.
Football-plus.az xəbər verir ki, bununla bağlı müraciət “Phuket Top Team” məşq komandasının sosial şəbəkədəki səhifəsində yerləşdirilib. Müraciət əsasən Fiziyevin növbəti döyüşdə üz-üzə gələcəyi amerikalı Castin Qeyciyə ünvanlanıb:
“Fiziyevin ev sahibinə kirayə borcu var. Yazdı ki, ödəyəcəm, amma ödəmədi. O, bu faktı danmır, sadəcə, pul vermək istəmir. Castin Qetji, zəhmət olmasa, onun kirayə pulunu topla”.
Qeyd edək ki, Fiziyevlə Qetji Londonda qarışıq döyüş növləri üzrə keçiriləcək UFC 286 turnirində qarşılaşacaq. Dünən görüşün dəqiq tarixi də açıqlanıb. Tərəflər martın 18-də üzə-üzə gələcək. Gecənin əsas döyüşü isə britaniyalı Leon Edvardsla ABŞ təmsilçisi Kamaru Usman arasında olacaq. Fiziyev son döyüşündə braziliyalı Rafael dos Anyusu məğlub edib, Qetji isə ötən ilin martında digər braziliyalı Şarlis Oliveyra da Silvaya uduzub.
Yüngül çəkidə MMA döyüşçüsü Nəriman Abbasovun da növbəti rəqibi açıqlanıb. Bu haqda 29 yaşlı döyüşçünün şəxsi məşqçisi Şəhriyar Abbasov “feysbuk” hesabında paylaşım edib. Abbasov "Naiza Fighting Championship" turnirində qazaxıstanlı Fanil Rafikovla qarşılaşacaq. Döyüş martda keçiriləcək. Nəriman son olaraq Las Veqas şəhərində keçirilən "Dana White’s Contender Series" turnirində braziliyalı İsmael Bonfimə uduzub.
