Nene “Vasku da Qama”nı tərk edib. Tanınmış braziliyalı futbolçu klubsuz qalıb.

"Football-plus.az" xəbər verir ki, Nene Rio de Janeyro klubunun formasını 2021-ci ildən geyirdi.

Karyerasının ilk illərini ölkəsinin “Paulista”, “Palmeyras” və “Santos” klublarında keçirən hücumameyilli yarımmüdafiəçi 2003-cü ildən Avropada top qovmağa başlayıb. Bu qitədə “Malyorka”, “Alaves”, “Selta”, “Monako”, “Espanyol”, PSJ və “Vest Hem”in şərəfini qoruyub. O, “Əl-Qarafa” (Qətər), “San Paulu” və “Fluminense”də də çıxış edib. Nenenin futbolçu həyatının ən uğurlu illəri PSJ-nin formasında keçib. 2010-13-cü illərdə çıxış etdiyi Fransa klubu ilə ölkə çempionatında 112 oyun keçirib, 48 qol vurub və 45 məhsuldar ötürmə edib.

Braziliya yığmasında oyun keçirmək şansı olmayan Nene gələn ildən “Vasku da Qama”da çalışacaq. Lakin onun hansı vəzifəni icra edəcəyi hələlik məlum deyil. 41 yaşlı forvardın ilin sonuna qədər karyerasını davam etdirib-etdirməyəcəyinə də aydınlıq gətirilməyib.