"Əslində, deyiləsi elə də çox söz yoxdu. Azərbaycan futbolu uzun illərdi necə idarə olunurdusa, indi də eyni qaydada fəaliyyətini davam etdirir. Əksəriyyət elə düşünürdü ki, Elxan Məmmədovun gedişi ilə müsbət mənada nələrsə dəyişəcək. Amma dəyişən heç nə yoxdu. Çünki bu AFFA rəhbərliyində eyni təfəkkürlü adamlar yığılıb. Hələ indi çıxıb deyirlər ki, uşaq futbolunu inkişaf etdirmək istəyirik. Bəs 15 il idi nə işlə məşğul idilər? De Byaziyə gəlincə, bu adam problemlərin səbəbi deyil, nəticəsidi. Yaşlı bir kişi artıq 4-cü tsikldi ki, milliyə rəhbərlik edir. Nə nəticə var, nə də bir oyun dəsti xətti. Belə biabırçı oyunlardan sonra AFFA onu postundan uzaqlaşdırmaqla ən azı xarakter göstərməliydi. Zatən onun yerinə kim gəlsə də, bundan daha betər olası deyil. Lakin bu həmin AFFA rəhbərliyidi ki, uğursuz seçmə mərhələdən sonra U-21-in baş məşqçisi Milan Obradoviçi vəzifəsində saxlamışdı və serb mütəxəssis növbəti tsikldə də pis nəticələr göstərmişdi. Bu adamları tanıdığımız üçün De Byazi ilə bağlı qərara təəccüblənmədim. Əksinə, istefaya göndərsəydilər, təəccüblənərdim".