Günə yaxşı başlamışdıq.

Səhər saat 10.00-da AFFA İcraiyyə Komitəsinin iclası start götürdü. Təxminən 1 saat sonra əməkdaşımız redaksiyaya məlumat göndərdi ki, Azərbaycan millisinin baş məşqçisi Canni de Byazi tələm-tələsik AFFA-nın binasını tərcüməçisi ilə birgə tərk edib. Heç media mənsublarının suallarını da cavablandırmayıb. Düşündük ki, bu, sondu. Artıq De Byazi ilə yollar ayırlıb. Amma sən saydığını say, gör İcraiyyə Komitəsinin üzvləri nə sayır.

Bir qədər öncə Zaur Axundov jurnalistlərə açıqlamasında deyib ki, italiyalının vəzifəsində qalmasına qərar verilib. Sən demə, məğlubiyyətdə tək günahkar baş məşqçi deyilmiş. Futbolçular da nəticələrə görə məsuliyyət daşıyır. Ok, anladıq. Qısaca, De Byazi vəzifəsində qaldı. Əvvəlcə fikirləşək ki, AÇ-2024-ün F qrupundakı ilk 2 oyundakı nətiəcələrə görə futbolçular məsuliyyət daşıyır, yoxsa baş məşqçi? De Byazinin taktiki düzülüşlərinə və ilk “11-liy”inə nəzər yetirək. Avstriya və İsveçin heyətində istənilən vaxt hesaba təsir edə biləcək oyunçular var idi. Bunu bilən italiyalı mütəxəssis 4-lü müdafiə sistemi ilə meydana çıxdı. Amma oyundan əvvəl bütün mütəxəssislər və futbol ictimaiyyəti düşünürdü ki, 5-li müdafiə sisteminə üstünlük verilməsi daha düzgün olar. Lakin De Byazi öz fikrində qaldı və nəticələri də gördüz.

Bundan əlavə, Avstriya ilə görüşdə Bəxtiyat Həsənalızadəni meydana kim çıxartmışdı? “Sabah”ın müdafiəçisi 1 ay idi ki, öz komandasında əsas heyətdə çıxış etməmişdi. Çünki futbolçu qolundan zədəli idi. Düşərgədə özünə gələn müdafiəçini Avstriya kimi komandaya qarşı oynatmaq nə qədər doğru idi? Bu qərarı da futbolçular vermişdi?

İndi bu məqamları nəzərə alanda günahkar kim olur? Əlbəttə ki, De Byazi. Çünki komandanın necə oynamalı olduğunu və meydanda kimlərin olmasını italiyalı müəyyənləşdirir.

De Byaziyə qibtə etmək lazımdı. Adam biabırçı məğlubiyyətlərdən sonra ölkəyə gəlmədi. Özünə vaxt qazandı. Sonra düşündü, daşındı, İcraiyyə Komitəsinin iclasında nələrsə dedi və üzvləri inandırdı. Bunun üçün böyük cəsarət və bir qədər də bilik lazımdı. Ölkəni Avropada biabır edəndən sonra rəhbərliyin qarşısına çıxmaq, özünü haqlı çıxartmaq böyük işdi. Alqışlayıram De Byazini. Belissimo, mister De Byazi!

İtaliyalının vəzifəsində qalmasının başqa adı yoxdu. İtaliyalı “qoca” İcraiyyə Komitəsinin hipnoz edib və özünə inandırıb. Ya da ki, AFFA-nın pulu qurtarıb. Mütəxəssisin təzminatını ödəyə bilmirlər. Vallah, pul yoxdusa, həll edə bilərik. Futbolun İnkişaf Fondu De Byazinin getməsi üçün kampaniya başlatsın. Sadə Azərbaycan xalqına üç seçim təqdim etsinlər:

1. De Byazinin getməsini istəyənlər 1 manat ödəsin

2. Yeni əcnəbi baş məşqçinin gətirilməsini istəyənlər 3 manat ödəsin

3. Millinin baş məşqçisinin yerli mütəxəssis olmasını istəyənlər 5 manat ödəsin

Sizi əmin edirəm ki, 500 mindən çox adam bu layihədə iştirak edər. Çünki ölkədə hamı De Byazinin getməsini istəyir. İcraiyyə Komitəsindən başqa. Heç olmasa, FİF belə layihə həyata keçirsin və öz pulumuzla yerli mütəxəssisin millinin baş məşqçisi olmasını təmin edək. Həm AFFA-nın De Byaziyə təzminat verməsinə kömək olaq, həm də öz məşqçilərimizin maaşını verək. Bunu etməsək, milli komanda səviyyəsində biabır olmağa davam edəcəyik. Hər dəfə də De Byazi müxtəlif yalanlar tapıb, İcraiyyə Komitəsinin üzvlərini buna inandıracaq. Sadə xalqın, futbolu sevən, milli qüruru düşünənlərin əziyyəti isə davam edəcək.

İLKİN SULTANLI