“Qarabağ” Avropa Liqasının 5-ci turunda səfərdə “Nant”a 1:2 hesabıyla məğlub oldu. Komandamızın növbəti mərhələyə vəsiqə qazanması artıq son turun matçından asılıdı.

Football-plus.az xəbər verir ki, “Nant”la qarşılaşma ağdamlılar üçün nə qədər əhəmiyyət daşıyırdısa, bir o qədər də Fransa təmsilçisi üçün önəmli idi. Oyundan öncə jurnalistlərə açıqlamasında rəqib futbolçular və baş məşqçi yaxşı hazırlaşdıqlarını, qarşılaşmanın onlar üçün finala bərabər olduğunu demişdilər. “Nant” son saniyələrdə olsa belə, istəyinə çatdı. Dünən göz gəzdirdiyimiz Fransa mətbuatı da qaliblərin şəninə tərif yağdırıb.

Lequipe.fr: “78-ci dəqiqədə oyuna daxil olan kamerunlu hücumçu İqnatius Qanaqo ardıcıl 3-cü qolunu vurdu. Bu çox vacib idi. O, bu qoldan sonra “Nant”ın heyətində özünü təsdiq etdi. Qanaqonun əsas vaxta əlavə olunan 5-ci dəqiqədə sağ ayağla mükəmməl çarpaz zərbəsindən sonra top bir neçə ayaq arasından keçdi və tora daxil olmamışdan əvvəl dirəyə toxundu. Qoldan sonra komandanın baş məşqçisi də onu buna təhrik edə bildiklərini açıqladı. Bu matçda az oynamasına baxmayaraq, vurduğu qol 23 yaşlı kamerunlu hücumçunun inkişafa qədəm qoymasının göstəricisidi. Qanaqonun əlavə vaxtda vurduğu qol sayəsində "Nant" Avropa Liqasında "Qarabağ"a qalib gəldi. Bu qələbədən sonra komandanın hələ də pley-offa vəsiqə qazanmaq şansı var”.

Sports.fr: “2001/02 mövsümündən sonra "Nant" ilk dəfə avrokubokların pley-off mərhələsində iştirak şansı qazandı. Komanda həftənin 4-cü günü çılğın axşam keçirdi. Hər şeydən əvvəl xəyal qurmağa davam etdi. Liqada işləri heç də yaxşı getməyən komanda Avropada inamla addımlayacağını 90+5-ci dəqiqə qolundan sonra qazandığı qələbə ilə sübut etdi. “Qarabağ”la “Bojuar” stadionunda qarşılaşan Antuan Kombuarenin yetirmələri İqnatius Qanaqonun qolu sayəsində mövsümdə ikinci Avropa uğurunu əldə edərək qrupda ilk “üçlüy”ə yüksəldi”.

Francetvinfo.fr: “Nant”ın futbolçuları azərbaycanlılar qarşısında bütün güclərini göstərdilər. Komandanın pressinqindən sonra rəqib qapıçı özünü itirdi və Lüdovik Blas 17-ci dəqiqədə hesabı açmaq fürsətindən maksimum istifadə etdi. İkinci hissədə Alban Lyafontun səhvi “Nant”ın qapısına 11 metrlik cərimə zərbəsi təyin oluması ilə nəticələndi. Filip Ozobiç isə topu tora göndərdi. Lakin “Olimpiakos”la qarşılaşmada olduğu kimi, “Nant” yenə əlavə vaxtda - İqnatius Qanaqonun çarpaz zərbəsi sayəsində 90+5-ci dəqiqədə üstünlüyü bərpa etməyi bacardı. Antuan Kombuarenin yetirmələri növbəti həftə Yunanıstanda qalib gəlsə, "Qarabağ" isə “Frayburq”la görüşdə uduzsa, qrupda ikinci yeri tutmaq imkanı əldə edəcək. Ən pis halda “Nant” Avropa yoluna Konfrans Liqasında davam edəcək”.

ŞAİR ABDULLA