“Qarabağ” – “Qalatasaray” matçı başa çatdı. İndi isə bu görüşdən sonra baş verən məsələləri müzakirə etməyin vaxtıdı.

Məsələn, İstanbul təmsilçisinin prezidenti Dursun Özbək TFF-yə təklif edib ki, türk dövlətlərindən olan futbolçular superliqada legioner sayılmasın. Ötən sayımızda bu məsələni necə həyata keçirə biləcəyimizi, ölkə futboluna faydasını və ziyanını izah etdik.

Görəsən, mütəxəssislər bu barədə nə düşünür? Həm Türkiyədə, həm də Azərbaycanda türk dövlətlərinin futbolçuları legioner sayılmasa, xeyrimizə olar? Sualımızı Türkiyədə çıxış etmiş millinin sabiq üzvlərindən Amit Quluzadəyə ünvanladıq. Onun “Football-plus.az” saytına açıqlaması belə oldu:

“Belə bir qərar olsa, yaxşı olar. Bizim futbolçuların Türkiyəyə getməsi asanlaşacaq. Amma bütün türkdilli ölkələrə şamil ediləcəksə, problem çıxacaq. Əlbəttə, bundan bəziləri istifadə edəcək. Kimin əlaqəsi güclüdüsə, yararlanacaq. Türkiyədən başqa digər türk dövlətlərinin futboluna baxanda bizim çempionat daha üstündü. Sadəcə, superliqada olsa, əla olacaq. Çünki futbolçularımız alternativ çempionat kimi Türkiyədə çıxış edərək səviyyələrini daha da artıra bilər. İnşallah, bu qərar verilər”.

İLKİN SULTANLI