"Qalatasaray" türk dövlətlərinin vətəndaşı olan futbolçuların superliqada əcnəbi sayılmaması üçün Türkiyə Futbol Federasiyasına (TFF) müraciət edəcək.

"Football-plus.az" xəbər verir ki, "Habertürk"ün məlumatına görə, İstanbul təmsilçisi sözügedən oyunçuların Türkiyə çempionatında yerli statusla çıxış etməsini istəyir. "Cim-Bom" rəhbərliyi Bakıda "Qarabağ"la yoldaşlıq oyunundan əvvəl və sonra böyük diqqət gördüyü üçün uzun müddətdi hazırladığı layihəni həyata keçirmək niyyətinə düşüb. Klub rəsmiləri TFF-yə nümunə kimi braziliyalı futbolçuların Portuqaliyada legioner sayılmamasını göstərəcək. Bu məsələ realdımı? Ümumiyyətlə, Azərbaycan futbolu üçün effektli ola bilərmi? Dursun Özbəyin istəyini həyata keçirmək üçün hansı hüquqi dəyişikliklər etmək lazımdı? Misli premyer-liqası üçün də bu təklifi dəyərləndirmək mümkündü?

Başlayaq hüquqi müstəvidən. Məsələ ilə bağlı idman hüquqşünası Fərid Haqverdiyevin fikrini öyrəndik. Görəsən, Özbəyin təklifini həyata keçirmək üçün nə etmək lazımdı? Tanınmış vəkil fikrini belə izah etdi:

Fərid bəyin açıqlamasından belə başa düşdük ki, dövlət səviyyəsində bu məsələnin həlli yolunda hansısa problem yoxdu. Çünki Türk Dövlətləri Təşkilatı adlı qurum mövcuddu. Bura Azərbaycan, Qazaxıstan, Qırğızıstan, Özbəkistan və Türkiyə daxildi. Adi çəkilən dövlətlərin hamısı təşkilatın qaydalarına əsasən öz çempionatlarında bu məmləkətlərdən olan futbolçuların rahat şəkildə legioner sayılmadan oynamasını təmin edə bilər. Görəsən, bunu Azərbaycan da həyata keçirə bilər? Qarşıdakı illərdə Türk Dövlətləri Təşkilatına daxil olan ölkələrin futbolçuları premyer-liqamızda legioner sayılmadan çıxış edə bilər? Məsələyə aydınlıq gətirmək üçün PFL-ə müraciət etdik. Qurumun media və marketinq direktoru Sənan Abdullayevin mövzu ilə bağlı fikri belə oldu: “Oxşar təklif əvvəllər də olub. Bütün türk dövlətlərinin futbol qurumları tərəfindən detallı araşdırılıb qərar verilməlidi. Ölkəmizdə də bu addım AFFA İcraiyyə Komitəsində müzakirə olunmalıdı. Ondan sonra PFL-in bunu bunu icra etməsində çətinlik görünmür”.

Görünən budu ki, Türk Dövlətləri Təşkilatına uyğun olaraq bu addımı atmaq mümkündür. Lakin bunun bizə xeyri nədi? Bir qədər də bu barədə düşünək. Onsuz da Azərbaycan millisi üçün futbolçuların səviyyəsi aşağıdı. Bir qədər güclü olan türkiyəli, qazaxıstanlı, qırğızıstanlı, özbəkistanlı oyunçular premyer-liqa klublarında boy göstərəcək. Bu ancaq işbaz menecerlərin və klub rəhbərlərinin işinə yarayacaq. Çünki artıq ucuz bazar ortaya çıxacaq. Türkiyənin Bal liqasında, elə Qırğızıstanda, Qazaxıstanda, Özbəkistanda çıxış edənlər Azərbaycan futboluna axın edəcək. Bu, məsələnin mənfi tərəfidi. Lakin xeyirimizə olan məqam da var. Belə ki, Türkiyədə də bu qərar qəbul olunsa, azərbaycanlı futbolçular rahat şəkildə superliqada oynaya biləcək. Belə olan halda onların səviyyəsi artacaq. Bir sözlə, belə bir qərar yalnız Türkiyə superliqası üçün verilsə, Azərbaycan futbolunun xeyrinə olar. Ən azı millimizin üzvlərinin çoxu bu liqada çıxış edərək səviyyəsini artıra bilər. Premyer-liqamızda türklərin, qırğızların, özbəklərin və qazaxların legioner sayılmadan çıxış etməsi isə bizə fayda verməz.

İLKİN SULTANLI