Misli premyer-liqasında 28-ci tura yekun vurulub.

"Football-plus.az" xəbər verir ki, "Sabah" "Qəbələ"ni qəbul edib - 3:2. Oyundan sonra meydan sahiblərinin çalışdırıcısı Murad Musayevin mətbuat konfransı keçirilib. Sizi mütəxəssisin fikirləri ilə tanış edirik:

- Avrokuboklara vəsiqə maksimum hədəf idi, ya gümüş medalçı olmaq hədəfi var?
- Avrokuboklara vəsiqə qarşımıza qoyulan məqsəd idi. Rahatlaşmırıq, daha yaxşı nəticələr əldə edə bilərik. Böyük işlər görmüşük, irəli getmək lazımdı. Qalan 8 oyunda yaxşı oynamalıyıq.

- Futbolçular oruc açanda nəyə etiraz edirdiz?
- Bu məsələyə hörmətlə yanaşıram. Rəqibin 9 nömrəsi fasilə verdi, orucunu açdı. Sonra qısa müddətdən sonra yenə futbolçular orucunu açdı. Deyirdim ki, fasilə olursa bir dəfə olsun.

- Milli komandanın köməkçi məşqçisi Arif Əsədov milli üzvlərinin fiziki durumunun yaxşı olmadığını dedi. Buna münasibətiniz nədi?
- Aleksey İsayev İsveçlə oyuna əsas heyətdə başladı. O, əla formada idi. Bəxtiyar Həsənalızadənin fiziki durumu isə pis idi, əlindən zədə almışdı. Bunlar sirr deyil. Lakin "Sabah"ın fiziki durumu qaydasındadı. Milli üzvlərinin fiziki formasının pis olduğunu deyə bilmərəm. Komanda olaraq yaxşı durumda idilər. Bizim komandaya gəlincə, keçmiş klubum "Krasnodar"la müqayisə etsəm, onlarla fərq görmürəm. Fiziki durumumuz yaxşıdı. Ümumi götürsək, çempionatın daha yaxşı olması üçün oyunlarda fasilə az olmalıdı. Nəticəyə oynayan komandalar vaxtı uzadırlar. Hakimlər bu cür şeylərə qarşı çox sərt olmalıdır. Çünki Avropada bu tip hallar keçmir. Hakimlər buna icazə vermir.

- Millinin Avstriyaya məğlubiyyətindən sonra Yusif İmanov və Bəxtiyar Həsənalızadə çox tənqid olundu. Onların psixoloji problemləri yoxdu?
- Bəxtiyar hazır deyildi, məşq etməmişdi. Bu mövzuya toxunmamaq lazımdı. Yusifə gəlincə, bəzən belə səhvlər böyük təcrübə qazandırır. O, üzərində çox çalışıb, daha yaxşı olmalıdı.