Növbəti iki dünya çempionatında futbolçu ilə təmsil olunacaq klublara ödəniləcək təzminatın məbləği artırılıb. Bu, FİFA ilə Avropa Klublar Assosiasiyası (AKA) arasında müddəti 2030-cu il dekabrın 31-nə qədər nəzərdə tutulan qarşılıqlı anlaşma ilə bağlı imzalanan memorandum çərçivəsində mümkün olacaq.

"Football-plus.az" xəbər verir ki, ali futbol təşkilatı 2026 və 2030-cu illərdə keçiriləcək dünya çempionatlarında futbolçuları iştirak edəcək klublara ümumilikdə 355 milyon dollar ödəyəcək. “Sky Sports”un məlumatında FİFA ilə AKA arasında razılaşdırılmış fondun futbolçuların DÇ-2022-də iştirakı üçün ayrılan məbləğlə müqayisədə 75 faiz artığı bildirilib. Qətərdə keçirilən mundialda klublara ödəniş fondu 209 milyon dollar təşkil edib. Təzminatın artırılmasının səbəbi dünya çempionatının formatının dəyişməsi ilə bağlıdı. DÇ-2026-da son turnirlərdəki kimi 32 yox, 48 komanda iştirak edəcək. Bu səbəbdən matçların ümumi sayı 64-dən 104-ə qədər artacaq. Xatırladaq ki, növbəti mundial üç ölkədə - ABŞ, Kanada və Meksikada keçiriləcək.

AKA Klublararası Dünya Çempionatının (KDÇ) yeni formatını dəstəkləyib. 2025-ci ildə start götürəcək turnirdə Avropanın 12 klubunun iştirak edəcəyi təsdiqlənib. FİFA ilə AKA arasında imzalanan memorandum çərçivəsində yeni turnirin – qadınlar arasında KDÇ-nin yaradılması da nəzərdə tutulub.