FİFA “Corriere dello Sport”un məlumatına rəsmi reaksiya verib.

İtaliya qəzeti təşkilatın matçların oyun vaxtının daha effektli istifadə olunmasını istədiyini iddia etmişdi. Məlumatda ali futbol qurumunun oyunların müddətini artırmaq niyyətində olduğu bildirilmişdi. Populyar idman nəşri bunun üçün birinci və ikinci hissələrdə əlavə edilən vaxtın müddətinin uzadılmasının nəzərdə tutulduğunu yazmışdı. Məlumatda bəzi hallarda oyunların dayanma vaxtı nəzərə alınmaqla, matçın ümumi müddətinin 100 dəqiqədən çox olacağı ehtimal edilirdi. Yeniliyin bu ilin son aylarında Qətərdə təşkil olunacaq dünya çempionatında sınaqdan keçirilə biləcəyi də qeyd edilmişdi.

Lakin FİFA “Corriere dello Sport”un xəbərini təkzib edib. Ali futbol qurumunun məlumatında belə deyilir: “FİFA matçların ümumi müddətinin artırılmasının mümkünlüyü ilə bağlı xəbərə reaksiya verərək bəyan edir ki, bu planda DÇ-2022-də və başqa turnirlərdə yenilik edilməyəcək”.