"Heç bir oyuna pis başlamadıq. İlk 20 dəqiqədə yığmamız rəqibləriylə başabaş mübarizə aparırdı. Amma fərdi səhvlər rəqibin qollar vurması ilə nəticələndi. Rəqiblərimiz də güclü idi. Təbii ki, bu sözlərim darmadağınlı məğlubiyyətlərə əsas vermir. Eyni zamanda, hər iki oyunda qələbə gözləyirdim desəm də, yalan olar. Uduzmaq ehtimalımız yüksək idi, amma bu qədər top buraxmaqla yox. Futbolçular səviyyəsindən aşağı çıxış etdi. Müdafiə olunmaq, top saxlamaq, əks-hücumlara çıxmaqda problemlər var idi. Fikrimcə, Qara Qarayevlə Maksim Medvedevin yeri görünürdü. Demirəm, onlar oynasa, mütləq qələbə qazanacaqdıq. Xeyr. Amma belə acınacaqlı nəticələr olmayacağına əmin idim. Yusif İmanova şans verilməsinə də münasibət bildirmək istərdim. Gənc qapıçıya güvənmək məsələsində iki yanaşmam var. Birincisi, "Sabah"ın qapıçısını sırf ölkə futboluna qazandırmaq və yığma təcrübəsinin olması əsas məqsəd idisə, ona hər iki oyunda şans verilməliydi. Bir oyunda oynadıb, digərində ehtiyatda saxlamaq düzgün qərar deyildi. Yox, daha yığcam müdafiə olunmaq və qapının toxunulmazlığı əsas şərt idisə, onda hər iki matçda daha təcrübəli qolkiperlərə şans verilməliydi. İstənilən halda, Avstriya və İsveçə qarşı oyunlar göstərdi ki, yığmamızda ciddi çatışmazlıqlar var. İnanaq ki, bu problemləri qısa zamanda aradan qaldıracaq və qarşıdakı oyunlarda daha yaxşı çıxış edəcəyik".