Bildiyiniz kimi, Uqo Lyoris ilin əvvəlində beynəlxalq karyerasını bitirdiyini elan edib.

"Football-plus.az" xəbər verir ki, yığmanın “1 nömrə”sinin gedişi Fransa üçün ciddi zərbə olmadı – onun “çərçivə”dəki yerini “Milan”da parlaq oyun göstərən Mayk Menyan tutdu. Hamını düşündürən əsas sual yeni qapıçının yox, yeni kapitanın kim olacağı ilə bağlı idi. Kərim Benzema ilə Rafael Varan da milli formada çıxışını başa vurduğundan, Didye Deşamın seçim imkanı məhdud idi – Antuan Qrizmann və ya Kilian Mbappe. 2014-cü ildən yığmanın şərəfini qoruyan Antuan 2016-dan komandanın tamhüquqlu lideridi. Klubda işlərinin necə getməsindən asılı olmayaraq, beynəlxalq arenada daim səviyyəli oyun göstərib. Mbappenin isə yenicə 24 yaşı olsa da, sonuncu dünya çempionatında komandasını necə arxasınca apara bildyini hər kəs gördü. Bundan başqa, Fransa mətbuatında yazılanlara inansaq, Kilian daha sərt və döyüşçülərə xas xarakterə malikdi. Deşam Qrizmann – Mbappe mübarizəsində ikincinin xeyrinə seçim etdi. Baş məşqçinin qərarla bağlı izahı: “Mbappe Fransa yığmasının yeni kapitanıdı, Qrizmann isə vitse-kapitandı. Kilian bütün bəndlərə uyğun gəlir və bu məsuliyyəti üzərinə götürməyə hazırdı. O, həm meydanda, həm də komandanın daxilində həlledici elementdi. Hər şey təbii yolla öz yerinə oturub. Kapitan sarğısı Kilian üçün əlavə öhdəlik olmayacaq”.

Mbappe martın 24-də - AÇ-2024-ün seçmə mərhələsi çərçivəsində çərçivəsində Niderlandla keçirilən oyunda yeni rolda debüt etdi. Özü də necə! “Narıncılar”ın darmadağınına (4:0) dubl və məhsuldar ötürmə ilə töhfə verməklə yanaşı, yığma tarixinin bombardirləri siyahısında 5-ci pilləyə yüksəldi. Kamavinqa oyundan sonra heyranlığını gizlətmədi: “Kapitan sarğısı ilə və ya onsuz – Mbappe dəyişməyib, həminkidi. Oyundan əvvəl bizə dedi ki, ilk dəqiqələrdən yaxşı oynamaq lazımdı. Fasilədə isə dayanmamağı xahiş etdi: 6 qol vurmaq lazımdısa, biz bunu etməliyik”. Yeni kapitan da oyunsonrası fikirlərini açıqladı: “Yaxşı apitan komandaya köklənən, oyunçuları öz ətrafında birləşdirməyə və arxasınca aparmağa qadir olan adamdı. Mən başqaları üçün açıq olmalı və qalan oyunçuların özünü ifadə etməsinə imkan yaratmalıyam”.

Qrizmann Deşamın seçiminə görə inciyəcəkmi?
Yığmaya yeni kapitanın təyin olunması ölkədə qızğın diskussiya doğurdu. O mənada ki, baş məşqçi Qrizmannı kənarda qoymaqla düzgün hərəkət etdimi? Fransa futbolunun əfsanələrindən Rober Pires bildirdi ki, Deşam Antuana hörmətsizlik göstərib, “L’Equipe” hətta yazdı ki, kapitanlıq məsələsi Qrizmannın yığmada karyerasını davam etdirməsi baxımından həlledici amil ola bilər. Ancaq işin əslində ciddi heç nə baş vermədi. Antuan bu vəziyyətə maksimal dərəcədə adekvat reaksiya göstərdi – Kilianı dəstəklədi, Niderlandın qapısına vurduğu ilk qolu onunla birgə bayram etdi. Çox güman, bu məsələdə Mbappenin meydandan kənardakı savadlı gedişi önəmli rol iynadı. O, kapitan sarğısını alan kimi bunları bəyan etdi: “Kapitanlıq mövzusunda Qrizmann ilə danışmışam. O, sarğını almadığına görə məyus idi və mən Antuanı anlayıram. Mən də eyni reaksiya göstərərdim. Antuan Deşam erasının ən vacib futbolçusudu. Birlikdə qələbələrə doğru addımlayacağıq. Mən onun rəisi deyiləm. Antuan komandaya nəsə demək istəsə, əyləşəcəm və onu dinləyəcəm”.

Deşam isə bu mövzunu belə davam etdirdi: “Əvvəlcə Antuan məyus idi və bu təbiidi. Ancaq bununla da hər şey bitdi, indi onun sifətində təbəssüm var. Antuan vacib rola malik vitse-kapitandı. O, həm məşqlərdə, həm də meydandan kənarda işıq saçır”.

Bir sözlə, belə görünür ki, Deşam doğru seçim edib və ən ası, paltardəyişmə otağında atmosferi qoruyub.

Sarğını daha gənc yaşda kimlər alıb?
Mbappeyə kapitan sarğısı 24 yaşında təqdim olundu və bu məqam heç kimi təəccübləndirməməlidi. Bəzi ulduzlar daha gənc yaşda belə etimada layiq görülüb. Məsələn, Messi 24 yaşında, hərçənd buna qədər də sarğını qolunda yoxlamışdı. Kriştiano Ronaldo 23 yaşında yığmada kapitan sarğısını götürüb. Düzdü, həmin sarğının Simaodan Ronaldoya verilməsi bir qədər qalmaqallı olmuşdu. Neymar sarğıya daha erkən – 22 yaşında yiyələnib. DÇ-2014-dəki fiaskodan sonra komanda iclasında Tyaqo Silvanın səlahiyyətlərinin ulduz hücumçuya verilməsi qərara alındı. Donnarumma 22 yaşında İtaliya yığmasının kapitanı oldu – bu isə son 56 il üçün “skadra adzurra”nın rekordudu. Bir qədər əvvəl isə 23 yaşlı amerikalı Aadmas DÇ-50-dan bəri ən gənc kapitan statusuna yiyələndi. Bu mənada fəaliyyətdə olan oyunçular arasında rekordçu isə Remsidi. Yaxınlarda beynəlxalq karyerasını bitirən uelski yığmada kapitan sarğısını ilk dəfə taxanda 20 yaş 90 günlük idi.