Fransa yığmasının yeni kapitanı məlum olub.

"Football-plus.az" xəbər verir ki, əvvəlki kapitan Uqo Lyorisin yığma karyerasını başa vurmasının ardından sarğı Kilian Mbappeyə həvalə edilib.

PSJ-nin 24 yaşlı ulduzu yığmanın baş məşqçisi Didye Deşam tərəfindən kapitan elan olunubsa, Antuan Qrizmann vitse-kapitan funksiyasını daşıyacaq.

Deşam açıqlamasında bildirib ki, Mbappe bütün keyfiyyətlərinə görə kapitan olmağa layiqdi. Amma təcrübəli mütəxəssisin bu qərarı Fransa futbol ictimaiyyətində heç də birmənalı qarşılanmayıb və yığma daxilində dərhal ab-havanın pozulmasına səbəb olub. Məsələn, Olivye Jiru təbii olaraq narazı qalıb. Fransa tarixinin ən məhsuldar oyunçusu statusunda olan, eləcə də yığmanın indiki heyətində ən təcrübəli futbolçu sayılan 36 yaşlı forvard sarğının ona veriləcəyini gözləyirdi. Amma yerli mənbələrin yazdığına inansaq, Jirunun artıq yığma karyerasının bitməsinə çox qalmayıb. Guya Deşam məhz bu üzdən ona üstünlük verməyib.

Amma ən diqqətçəkən xəbərlər Antuan Qrizmannla bağlıdı. Yerli futbol ictimaiyyəti sarğının məhz Qrizmanna verilməsinin tərəfdarı idi. Tanınmış sabiq fransalı futbolçu Rober Pires Deşamın qərarını Qrizmanna qarşı hörmətsizlik adlandırıb.

"Atletiko''nun ulduzu yığmanın dünənki məşqinə qaş-qabağlı və pis əhval-ruhiyyədə çıxıb. Hətta ''Onze Mondial'' nəşri iddia edir ki, 32 yaşlı Qrizmann ciddi şəkildə yığma karyerasını başa vurmaq haqda düşünür. Deyilənə görə o, sonuncu dəfə yığmanın düşərgəsinə gəlib. Qrizmannın indiyə qədər yığmada 117 oyuna 42 qol vurduğunu bildirək.

ƏLİ