“Formula-1”in cari mövsümündə arxada qalan hər iki mərhələ “Red Bull” pilotlarının qələbəsiylə bitib.

"Football-plus.az" xəbər verir ki, Maks Ferstappen Bəhreyndə, Serxio Peres isə Səudiyyə Ərəbistanında finişə birinci çatıb. “Red Bull”un avtoidman üzrə məsləhətçisi Helmut Marko son müsahibəsində Ciddə mərhələsinə yekun vurmaqla yanaşı, şirkətin rəhbərlərindən biri Oliver Mintslaff ilə aralarında münaqişə yaşanması haqdakı şayiələri də şərh edib.

- Ciddədəki yarışdan sonra “Red Bull”un mətbuat xidməti Avstriya televiziyasının sizlə əvvəlcədən anons olunan müsahibəsini ləğv etdi. Bu o anlama gəlir ki, siz bir daha media ilə sərbəst ünsiyyət qura bilməzsiz?
- Narahat olmayın, mən buna imkan vermərəm. Həmişə düşündüyümü deyəcəm. İstənilən vaxt.

- Bəlkə bu müsahibənin ləğvi “Leyptsiq”in “Mançester Siti”yə 0:7 hesablı məğlubiyyətindən sonra sizin Mintslaffın ünvanına heç də xoş olmayan ifadələr işlətməyinizə verilən reaksiyadı?
- Almaniyada bu tarixçəni şişirdiblər. Cənab Mintslaff ilə normal münasibətlərimiz var, müntəzəm ideyalarımızı bölüşürük. Ancaq mən müstəqil adam kimi qalmaq istəyirəm.

- İdman nəticələri baxımından “Red Bull Racing”i tənqid etmək üçün əsas tapmaq çətindi...
- 15-ci yerdən start götürən Maks Ferstappenin Ciddədə finişə 2-ci yerdə - Serxio Peresdən sonra çatmasından razı ola bilərik.

- Bununla belə, təsnifat mərhələsində üzləşdiyi texniki problem Maksı qəzəbləndirdi və o, brifinqə mühəndislərlə birgə gəldi. Düzdü?
- Maks yenicə ağır qripi arxada qoyub. Onun kokpitdən çıxarkən necə təsir bağışladığını gördüzmü? Özünü pis hiss edirdi, mümkün qədər tez uzanmaq istəyirdi.

- Ancaq bazar günü Maks yetərincə sürətli idi, hətta günün ən sürətli dövrəsi də onun hesabında oldu, Peresi arxada qoydu. Komandada belə qarşıdurma mümkündümü? Niko Rosberqlə Lüis Hemilton arasında olduğu kimi...
- Ümumilikdə hər iki pilot komandanın tələblərinə əməl etdi. Finişə 5 dövrə qalmış onlara deyildi ki, bütün gücləri ilə hücum edə bilərlər. Peres də yaxşı taktikdi, bu üzdən sonda ən sürətli dövrə rekordunu ələ keçirmək istədi, ancaq 1-ci sektorda səhv etdi. İki əla pilotumuz olduğuna görə başqalarıyla mümkün qədər böyük fərq yaratmalıyıq.

- Fernando Alonso ilə bağlı durumu necə dəyərləndirirsiz? Əvvəlcə onu cərimələdilər, ardından 3-cü yerə qaytardılar.
- Domkratla bağlı insident 20-ci dövrədə baş verdi. Sadəcə, gülməlidi ki, stüartlar finişi və mükafatlandırma mərasimini gözlədilər və yalnız bundan sonra 10 saniyəlik cəriməni elan etdilər. Bundan da gülməlisi odu ki, sonradan həmin cəriməni də aradan qaldırdılar.