Fransanın öndə gələn nəşrlərindən olan ''Ekip'' maraqlı bir araşdırma aparıb.

"Football-plus.az" xəbər verir ki, nəşr Fransa çempionatında çıxış edən oyunçuların qazancını öyrənmək qərarına gəlib.

Gözlənildiyi kimi bu baxımdan PSJ-nin futbolçuları hamını üstələyib. Belə ki, ən çox qazanan oyunçuların ilk ''10-luğ''unda yer alanların hamısı məhz bu klubun üzvləridi! Amma Kilian Mbappenin həm aylıq, həm də ümumi qazancı şok effekti verib.

Araşdırmanın nəticələrinə əsasən Mbappenin aylıq 6 milyon avro (!) qazandığı üzə çıxıb. Özü də bura bonuslar və başqa pullar daxil deyil deyil. Neymar 3,675 milyon avro maaşıyla 2-ci, Lionel Messi 3,375 milyon avro maaşla 3-cü pillədə qərarlaşıb. Bilindiyi kimi Mbappe 2021-də PSJ-ni tərk edərək ''Real''a yollanmağa yaxın idi. Amma o, son anda Parisdə qalaraq 2025-ə qədər nəzərdə tutulan müqaviləyə imza atdı. Müqavilədə maaşdan başqa da başgicəlləndirici rəqəmlər yer alıb.

2025-ə qədər Mbappe təkcə performans bonuslarından 72 milyon avro qazana bilər. Müqavilədə 180 milyon avroluq sədaqət bonusu da yer alır. Bundan başqa 2022-dən başlayaraq Mbappe klubda qaldığı 1-ci il üçün əlavə 70, 2-ci il üçün 80, 3-cü il üçün isə 90 milyon avro qazanacaq. Başqa sözlə desək, 24 yaşlı forvard 2025-ə qədər PSJ-də qalsa, bu 4 illik dönəmdə ümumilikdə 630 milyon avro qazanacaq ki, bu da futbol tarixinin yeni rekordu olacaq! Mbappe bu mövsüm 33 rəsmi oyunda 31 qol, 8 məhsuldar ötürməlik performans sərgiləyib. Sonda bu siyahıdakı ilk 10 futbolçunun və onların aylıq maaşını diqqətinizə çatdırırıq.

Mbappe - 6 (milyon avro)
Neymar - 3,675
Messi - 3,375
Markinyos - 1,2
Verratti - 1,2
Hakimi - 1,08
Donnarumma - 916 (min avro)
Ramos - 791
Bernat - 730
Mukiele - 700