“Bavariya”nın ölkə çempionatında liderliyi əldən verməsi bossları yaman pərişan edib.

“Football-plus.az” xəbər verir ki, onlar martın 19-da “Bayer-04”ə məğlubiyyətdən (1:2) bir neçə gün sonra adekvat addım atmağı lazım biliblər.

Martın 24-də Yulian Naqelsmann istefaya göndərilib. Baş məşqçi vəzifəsinə 2021-ci ilin yayında təyinat alan 35 yaşlı mütəxəssisin köməkçiləri Dino Topmöller, Bencamin Qlük və Ksavyer Zembrod da işdən azad olunub. Komandanı ötən mövsüm bundesliqada və iki dəfə Almaniya Superkubokunda qələbəyə daşıyan Naqelsmannın müqaviləsi 5 illik müddətə nəzərdə tutulmuşdu. Bu o deməkdi ki, Münhen klubu məşqçiyə təzminat ödəməli olacaq. “Bild” qəzetinin yazdığına görə, rəhbərlik mövsümün qalan hissəsinin məvacibini (3 milyon avro) ödəyəcək. Klub onunla müqaviləni yalnız mövsüm başa çatandan sonra qüvvədən salmağı planlaşdırır. Bu halda Naqelsmanna sözləşmənin qalan müddətinə görə nəzərdə tutulan maaşın 50 faizi – təxminən 12 milyon avro ödənilə bilər. “Bavariya” bu sxemə əsasən, çalışdırıcıya görə onun anlaşacağı yeni klubdan təzminat tələb etməyəcək. Qeyd edək ki, “Bild” daha əvvəl məşqçi dəyişikliyinin münhenlilərə ümumilikdə 27 milyon avroya başa gələ biləcəyini xəbər verib. Bu məbləğ gənc mütəxəssisin 2026-cı ilin yayına qədər almalı olduğu məvacibin qalan hissəsini təşkil edir. Maraq üçün Almaniya nəhənginin onu “Leyptsiq”dən bonuslar da nəzərə alınmaqla 25 milyon avro təzminat bahasına ayırdığını da yada salaq.

“Bavariya” artıq baş məşqçi vəzifəsinə Tomas Tuxeli təyin edib. Onunla bağlanan müqavilənin müddəti 2025-ci ilin yayına qədər nəzərdə tutulub. “Bild” 49 yaşlı alman çalışdırıcının illik məvacibinin təxminən 10-12 milyon avro olacağını yazıb. Daha əvvəl “Maynts-05”, “Borussiya” (Dortmund), PSJ və “Çelsi”ni çalışdıran Tuxelin yeni komandada debütü sabiq klubuna qarşı olacaq: “Bavariya” bundesliqanın növbəti turunun aprelin 1-nə təyin olunan oyununda “Borussiya”nı qəbul edəcək.

Klubun prezidenti Herbert Hayner Naqelsmannın istefaya göndərilməsinin səbəbinə belə aydınlıq gətirib: “Bəli, mən Yulianı tam dəstəkləyirdim və onunla daim uzunmüddətli layihə haqda danışırdım. Ümid edirdim ki, bunu yaratmaq olar. Naqelsmann əla məşqçidi, amma nəticə hər şeydən üstündü. “Bayer”lə oyun məni düşünməyə məcbur etdi. Təbii ki, uzun müddət Oliver Kan və Hasan Salihamiciçlə məsləhətləşdim. Nəticədə belə qənaətə gəldik ki, mövsümlə bağlı planlarımızı yerinə yetirmək üçün real işə başlamaq lazımdı. Tanrıya şükür ki, bizim hələ də hər üç turnirdə qalib gəlmək şansımız var”.

Klubun rəhbəri yeni baş məşqçi Tuxel haqda da danışıb: “Tuxelin təyinatı, heç şübhəsiz, düzgün qərardı. Uzun illər əvvəl onunla çalışmaq istəyirdik, amma alınmamışdı. Son illər Avropanın böyük klublarında inanılmaz uğurlar qazanıb. Tuxel Avropanın ən istedadlı məşqçilərindən biridi”.