Məlum olduğu kimi, “Liverpul” “Real” qarşısında geridönüş edə bilmədi: “Enfild”dəki oyunun ardından “Santyaqo Bernabeu”da uduzmaqla ÇL-də mübarizəni dayandırdı. Amma Yürgen Klopp bu məğlubiyyətə də pozitiv yanaşdı – oyunun sonuna yaxın kameralar ona yönələndə gülüş saçdığını gördük. Karlo Ançelotti isə almaniyalının fonunda düşüncəli və “yüklü” görünürdü. Hərçənd ekranda bu mənzərənin əksi olmalıydı.

Yadınızdadısa, “Liverpul”la “Real” arasındakı ilk oyunda da operatiorlar gülən Kloppu “yaxalamışdı”. Oyunun həmin anında İngiltərə klubu artıq 2:5 uduzurdu. Onlarla belə nümunə göstərə bilərik.

2022-nin avqustu. “Liverpul” “Fulhem”ə uduzur, ancaq Kloppun simasından nikbinlik yağır. Onda oyun 2:2 hesabıyla bitdi.

2019-un oktyabrı. İndicə Takumi Minamino “Zaltsburq”un “Liverpul”dan geriliyini bir qola endirib. Vəziyyət gərgindi, ancaq almaniyalı baş məşqçi yaponiyalının qolunu gülüşlə qarşılayır.

2019-un mayı. “Liverpul” “Nou Kamp”da “Barselona”ya 0:3 uduzur, Yürgen isə yalnız gülümsəyir. Sonradan nələrin olduğunu xatırlayırsızmı?

2018-in noyabrı. “Srvena Zvezda” 7 dəqiqə ərzində vurduğu iki qolla “Liverpul”u şoka salır. Klopp da şokdadı, ancaq yenə də gülür. Mersisaydlılar həmin oyunu xilas edə bilmədi.

Klopp hətta 2018-də Çempionlar Liqasının finalında “Real”a uduzandan sonra da qəm dəryasında batmadı – səhər saat 6-ua qədər dostlarıyla birgə mahnı oxudu. Təbii ki, məğlubiyyətdən sonra da üzündə təbəssüm görünməsinin səbəbini ondan soruşanlar var. Almaniyalı hələ 2019-da “The Players’ Tribune” üçün yazdığı sütun yazısında bu məqama aydınlıq gətirib. Bu gülüşün arxasında bütöv bir fəlsəfə yatır: