"Sonuncu yeri tutan komandanın diviziona düşəcəyinin dəqiqləşməsi çempionata əlavə mübarizə, motivasiya qatdı. 3-cü dövrə kimi, 4-cü dövrə də ikinci "5-lik" komandalarının amansız mübarizəsiylə diqqəti çəkəcək. 27-ci turda səfərdə "Səbail"lə qarşılaşan "Turan Tovuz" 1 xal qazanmaqla böyük ölçüdə 6-cı pillədəki yerini rahatlatdı. Əsas mübarizə qalan 4 komandalara arasında gedəcək. Amma hansı komandanın elitanı tərk etməyə daha yaxın olduğunu birmənalı şəkildə demək çox çətindi. Onların 4-cü dövrədəki matçlarına ölüm-dirim savaşı deyərdim. Komandalar arasında xal fərqi azdı. Kim qələbə qazanırsa, irəliləyir, 1 xal qoparırsa, mövqeyini möhkəmləndirir. "Kəpəz"lə "Şamaxı" mübariz, kreativ oyunla seçilir. Sırf müdafiədə oturmaqla 1 xal qoparmaq yox, əks-hücumlar təşkil etməklə də diqqət çəkirlər. "Şamaxı" Gəncə təmsilçisiylə müqayisədə əks-hücumla yanaşı, mövqe hücumları da qurmaqla göz oxşayır. Bunun da əsas səbəbi odu ki, "şirlər" mövsümün əvvəlində daha çox müdafiə olunmaqla məşğul idi. Arxa xətdə istədikləri etibarlılığı və kompakt bağlanmağı “oturdandan” sonra 2-ci dövrədə rəngarəng hücumların şahidi olduq. "Kəpəz"də əsas ağırlıq Ayzaya, Junior, Kvirkviya, Şuaybu kimi sürətli, texnikalı oyunçuların üzərinə düşürsə, "Şamaxı"da bu sırf yerli futbolçuların kollektiv oyununa əsaslanır. Onu xüsusi vurğulayım ki, "Şamaxı", “Qarabağ”ı nəzərə almasaq, turnir cədvəlinin yuxarı pillələrində qərarlaşanlara qarşı daha yaxşı çıxış edir. Sadəcə, heyət əsasən gənclərdən formalaşdığına görə bəzi epizodlarda tələskənliyə, səhvə yol verir və sanki 60-70 dəqiqə yaxşı çıxış edə bilirlər. Düşünürəm ki, heyətdə Elvin Məmmədovla yanaşı, daha 2-3 təcrübəli futbolçu olsa, vəziyyət daha yaxşı olar.

"Səbail"ə "Sumqayıt" nə qədər mübariz oyun sərgiləməyə çalışsa da, qeyri-sabit çıxış edir. Hər iki komanda mövsümə uğursuz start verməklə yanaşı, optimal heyətini formalaşdıra bilmədi. Bunun acı nəticəsi bu gün də görünür. Həmçinin komandaların baş məşqçiləri dəyişdi ki, onlar da heyəti yenidən komplektləşdirməyə çalışdı. Hardasa istəkləri gerçəkləşdi, amma yenə də heyətin tam oturuşmadığını düşünürəm. Məsələn, "Sumqayıt"da Vüsal İsgəndərli hamıdan çox qaçır, fəaldı, amma ötürmələrdə və zərbələrdə dəqiq deyil. Yaxşı futbolçu olsa da, istədiyini meydanda göstərə bilmir. "Səbail"də fərdi keyfiyyətləri yüksək olan futbolçular var. Amma komanda oyunu görünmür. Məsələn, Zakpa, Qomis və Ağabalanın adını çəkə bilərəm. Hər iki komanda meydanda döyüşür. Düzdü, "Sumqayıt" son 2 oyunda darmadağın oldu. Bu da komandaya psixoloji cəhətdən təsir göstərəcək. Ona görə də "kimyaçılar" digər komandalarla müqayisədə yalnız taktiki və fiziki yox, həm də psixoloji cəhətdən toparlanmalıdı. Əks halda çox çətin olacaq. Fasilə dönəmində komandaların hazırlığından da çox şey asılı olacaq. Yığmaya əsasən ilk "5-lik" klublarından futbolçular çağrılıb. Onların yorğun gələcəyini və ikinci "5-lik" komandalarının tam heyətlə hazırlıq keçəcəyini nəzərə alsaq, "Qarabağ", "Səbah", "Neftçi" və "Zirə"dən xal qoparmaq şansı artır. Bir sözlə, elitada qalmaq uğrunda sona kimi gərgin mübarizə gedəcək".